Ramri veng tur Mizo hlang awmna din a nih theih nan bawhzui a ni - Home Minister

Home minister Lalchamliana chuan ZPM member Vanlalhlana zawhna chhángin, Mizoram chhunga India leh ram dang ramri veng tur CRPF emaw central force dang din a nih theihna atan sorkarin a bawhzui zel thu a sawi.

Vanlalhlana chuan, kum 2019-a Union Home minister Amit Shah a lokal ṭumin, Mizo ṭhalaite luh hukna tur force din chungchang a sawi thu tarlangin, "Hei hi sorkarin a bawhzui loin ka hria," a ti.

Home Minister Lalchamliana chuan, Amit Shah chuan, 'CRPF or central for ex­clusively for Mizo youth' ti zawnga a sawi nia a hriat thu sawiin, "Theihtawpin bawhzui a ni," a ti a; Chief Minister-in December 2020 pawh khan DO letter a thawn thu a sawi.

Central-in ramri a ngaih pawimawh thu sawiin Lalchamliana chuan, "Ramri zir chiang turin sorkar laipui chuan Madhukar Gupta Committee a din a, kum 2016 khan Aizawlah an lokal a, khatih laia sorkar khan tualchhung mite ramri veng tura dah a rawt. Committee chuan ngai pawimawhin MHA-ah a recommend a ni," a ti.

Home Minister chuan, Madhukar Gupta Committee recommendation chu a reh vung vung thu sawiin, "Kum 2019-a Amit Shah a lo kal khan Chief Minister-in a thlen a ni," a ti a; ramri venghim tur Mizo hlang awmna din a nih theihna atan sorkarin theihtawpa a bawhzui thu a sawi a ni.