State páwna hna thawk mi 2,637 Covid-19 avangin an rawn haw

Labour, Employment, Skill Development & Entrepreneurship (LESDE) minister Lalchhandama Ralte chuan, Mizoram Youth Commission (MYC) chhinchhiah danin, Mizoram páwna hna thawk, Covid-19 lêng avanga rawn haw mi 2,637 an awm thu Assembly House a hrilh.

MNF member Dr F Lalnunmawia zawhna chhangin Lalchhandama Ralte chuan, "Mizoram páwna hna thawka awm Covid-19 pandemic avanga Mizorama rawn haw zat MYC-in a buatsaih Comprehensive Database of Migrants Workers 2020-a chhin chhiah zat chu mi 2,637 an ni," a ti.

LESDE Minister chuan, state páwn aṭanga rawn hawte chhawm­dawlna atan Mizoram sorkarin LESDE kaltlangin hma a lak thu sawiin, "First phase zawh tawh a ni a, training chi hrang hrang pek tawh an ni. Mi 720 hnenah training pek a ni," a ti a; phase-II a rang thei ang bera chhunzawm a nih dawn thu a sawi.

ZPM member VL Zaithanzama zawhna chhangin LESDE Minister chuan, central service-a luh tum mi 20 hnenah full scholarship pek a nih thu a sawi a, "Open advertisement hmangin a duh apiang tan dilna hun hawn a ni. A diltute aṭangin written exam leh personal interview hmangin a ti ṭha mi 20 thlan a ni," a ti.