MLA hoin sangha an bomb nia sawi chungchang MPYCC-in an bawhzui

Mizoram Pradesh Youth Congress Committee hruaitute chuan nimin khan Mamit Police Station-ah November 21, 2020-a Tut luia sangha bomb hmanga man chungchanga FIR thehluh tawh an bawhzui. Dan ang taka police-in hma an lak an beisei thu an tarlang.

Nikum November 21 khan Mamit bialtu MLA H Lalzirliana leh Mamit leh Phaizau khuaa MNF party hruaitu ṭhenkhatte'n bomb hmangin Phaizau khawtlangin Tut lui an humhalh huam chhungah sangha an mana sawi a ni a; chumi chungchangah chuan Vanramchhuangi, Chaltlang-in December 9, 2020 khan Mamit PS-ah FIR a thehlut a ni.

Nimina Mamit PS tlawhtu MPYCC hruaitute chu officer-in-charge Freddy Lalramthara'n a lo dawngsawng a; MPYCC vice president F Lalhmangaiha chuan, "Police hmalakna hnuaiah mi thil ti theite leh mi náwlpuite'n dan hnuaiah rorelna dik tak kan chan tlàn kan beisei a, chumi ang tak chuan police-te'n hma an lak kan beisei," a ti a; sangha bomb thu chu a zûzi mai loh nan an bawhzui zel dawn thu a sawi.

MPYCC tarlan danin, Mamit PS OC Freddy Lalramthara chuan, a ṭul ang an ti vek nia sawiin, "Witness kan neihte'n a bomb lo an ti ta vek a, pakhat chiahin a bomb alawm a ti a, a buaithlak khawp mai. Lawng pahnih an hmanga a bomb titu khan a hmu si lo a, pali zinga pakhat chiah kha kan innghahna ber a ni ta a, statement aṭangin chargesheet kan siam a ngai dawn a ni," a ti.

Mamit OC chuan, finfiahna ṭha tak a awm a nih loh chuan mi man a ṭul rih lo nia sawiin, "He thil hi kan vawm ral mai mai dawn lo," a ti a; Phaizau khawtlang hnena H Lalzirliana ten Rs. 10,000 an pek chungchang an zawhfiah thu leh dan bawhchhiat vangin pawisa an cháwi nia an sawi thu a sawi bawk.