Lunglei College library building hawng

Higher & Technical Education (HTE) minister Dr R Lalthangliana chuan nimin khan Lunglei College library building thar a hawng a; chawhnu lamah RUSA 2.0 sum Rs. 74,00,000 hmanga sak J Buana College multipurpose hall a hawng bawk.

Lunglei College library building hi RUSA 2.0 sum cheng nuai 100 leh SEDP sum cheng nuai 31, a vaiin cheng nuai 131 sénga sak a ni a, a satu chu Sky Ridge Engineering, Aizawl a ni.

Dr R Lalthangliana chuan, Lunglei College-in library changtlung tak a nei ta chu zirlai leh zirtirtute'n ṭangkai taka an hman a duh thu a sawi a, "Zirlaite'n in zirlai in ngaih pawimawh hmasak ber a ṭul. Tum mumal neiin, chhungkua, khawtlang leh ram tana chhawr tlak nih tum ang che u," a ti.

HTE Minister chuan, sorkar laipui aṭanga RUSA fund dawng zel turin NAAC endikna hlawhtling taka college-te'n an hmachhawn ṭhin a ṭul thu leh Mizorama college zawng zawngin tha thlah loa ṭan an lâk reng a duh thu a sawi.

Dr R Lalthangliana chuan, Bangladesh nena insumdawn tawnna tihlawhtling thuai tura hmalak mek a nih thu leh March 19, 2021 hian Bangladesh sorkar mi pawimawhte hmu turin Dhaka-ah kal a tum thu a sawi bawk.

Lunglei College hi September 10, 1964-a din a ni a; tun dinhmunah department 14-ah zirlai B.A 822 leh B.Sc 207, an vaiin 1,029 an awm a, zirtirtu 67 (regular 44) an awm bawk. Kum 2017 khan NAAC grade B++ a hmu a ni.

J Buana College hi kum 1983 a din a ni a, Arts leh Commerce zirna a ni a, zirlai 454 an awm. Zirtirtu a ngheta thawk 21, contract-a thawk pakua, part time-a thawk pahnih, RUSA hnuaiah pathum, casual faculty panga leh non-teaching staff an awm bawk.