World Consumer Rights Day hman a ni

Nimin kha World Consumer Rights Day a ni a, consumer pawlte'n Aizawl leh district hrang hrangah an hmang. Kumina Day thupui chu 'Tackling plastic pollution' tih a ni.

Aizawlah chuan Mizoram Consumers Union (MCU) buatsaihin Central YMA Hall-ah hman a ni a, Food, Civil Supplies & Consumers Affairs (FCSCA) minister K Lalrinliana'n hmanpuiin, district ti ṭhate hnenah lawmman a sem.

K Lalrinliana chuan, consumer-te dikna leh chanvo a pawimawh thu sawiin, "Kum 2019-ah Consumer Protection Act thar kan nei a, hemi hmang hian India ramah mipui chanvo humhalh a nih theih nan sorkar leh he lama hmalatute'n an kalpui ṭan a ni," a ti a; sumdawnnaah duhâmna a nasat tawh avangin consumer right chu mipuiin an hriat chian a ṭul thu leh plastic chu khawvel tichhetu a nih theih avangin fimkhur a ṭul thu a sawi.

FCSCA department-in an duh anga chaka hma an lak theih loh thu sawiin Minister chuan, "Staff indaih lohna a nasa em em a, district anga hma kan laknaah pawh duhthu a sam thei rih lo. Ṭan lakna tur tam tak a la awm a ni," a ti.

Inkhawm hi FCSCA secretary Vanlalngaihsaka'n a kaihruai a, FCSCA director Ramdinliani leh Aizawl DC Dr Lalhriatzuali Ralte ten consumer right chungchang an sawi.

Minister chuan district consumer association ti ṭha ber Serchhip district leh District Consumer Disputes Redressal Commission ti ṭha ber Aizawl district hnenah lawmman a hlân a, documentary video leh video clip insiamsiak lawmman a sem bawk.

Mamitah chuan District Consumer's Organization buatsaihin IPR hall-ah World Consumer Rights Day, 2021 hman a ni a, additional DC R Vanlalsawta'n a hmanpui.

Hnahthialah pawh Hnahthial College auditorium-ah Hnahthial District Consumers' Union buatsaihin World Consumer Rights Day hman a ni a, bawrhsap H Dolianbuaia khuallian a ni.