Assam Rifles-te Zokhawsang hmuna An insawn hun tur hriat theih a la ni lo

Aizawl khawpui lailía awm Assam Rifle-te chu an hmun thar, Zokhawsanga an insawn chhuah hun tur hriat theih a la ni lo. Ministry of Home Affairs (MHA) chuan Assam Rifles-te chu May 31, 2019 hmaa Zokhawsanga insawn turin a lo ti tawh a ni.

Vanglaini palai zawhna chhangin Mizoram sorkara Home department hotute chuan, Assam Rifles-te'n Aizawl khawpui lailía an hmun an chhuahsan hun tur chungchangah thu thar hriat an la neih loh thu an sawi a, "Engtikah nge an chhuahsan dawn kan hre lo. May 15, 2019 khian Assam Rifles hotute Home changtu Chief Secretary hoa kawm a, an inbuatsaih dante zawhfiah paha pressure pek kan tum," an ti.

Home department hotute chuan, Assam Rifles-te'n insawn chhuahna hun atan kumin (2019) chhung dil mah se, MHA-in a phal sak lo nia sawiin, "Chhuanlam siam mah se, MHA-in hun a bituksak chhunga an insawn chhuah ngei theihna atan hmalak kan tum," an ti a; Assam Rifle-te'n chhuanlam an siam a nih pawhin, an nawr ve tur thu an sawi.

Home department hotute sawi danin, Assam Rifles-te chuan Lammual chhehvela an hmun luah mek an chhuahsan hunah pawh chhuahsan tel loh tum an nei a, chu'ng zingah chuan Quarter Guard a tel. Assam Rifles-te'n Quarter Guard an chhuahsan duh loh chhan chu, hmànlai thil hlu (heritage) humhalh ngai a nih vang a ni.

Quarter Guard chungchang hi INTACH, Mizoram Chapter hotute pawh sawipui a ni tawh a, mahse, heritage site-a puang tur chuan Assam Rifles aṭangin no objection certifcate (NOC) hmuh a ngai. MHA chuan, February 19, 2019 khan office memorandum tichhuakin, Aizawla Assam Rifles battalion headquarters (Lammual leh a chhevel) chu May 31, 2019 hmaa chhuahsan turin a ti a; MHA Additional Secretary (Police) kaihhruaina hnuaia February 7, 2019 meeting thuchhuak angin, Aizawla Assam Rifles-te hi Zokhawsanga insawn tura tih an ni.

Hetih lai hian, tuna Assam Rifles-in an luah chin rama ram nei nia sawite chuan tun hnai khan Home department-ah lehkha an thehlut a, Assam Rifles-te chuan an ram chin bâk an ram angah an chhal niin an tarlang. Assam Rifles an chhuah hunah pawh an ram chu sorkar rama telh ve lo turin an ngen a ni.

Kum 2012-ah chutih laia AR DIG Brig. SP Rawat chuan AR ram chhuahsan an tum hnaih avangin AR ram chhunga LSC neite chu an LSC sorkara pe kîr vek turin hriattirna a tichhuak a, pe lut lo an awm a nih chuan FIR an thehluh tur thu a lo sawi tawh. AR DIG hian July 2012 khan LSC neitu sorkara pe kîr ve lote lakah FIR a lo thehlut tawh a ni.