CS leh India palaite'n Rihkhawdarah India-Myanmar inlaichina an sawiho

Nimin khan chief secretary Lalnunmawia Chuaungo leh Myanmar-a Indian ambassador Sau­rabh Kumar chu Rihkhawdar, Myanmar-ah an inkâwm a; chumi hnuah Zokhawthara Land Custom Station-ah Indo-Myanmar inlaichînna, inkalpawhna, insumdawn tawnna leh thil pawimawh dangte an sawiho.

Meeting-ah hian India sorkar leh Myanmar sorkar inkara thawhhona hrang hrang awm te, India sorkar puihna hmanga Myanmar ram chhunga inkalpawhna kawngpui, Zokhawthar-Tiddim kawng siam mek chak zawka kalpui chungchang te, Ṭiau lui kânna lei lian leh rinawm zawk Indo-Myanmar Friendship Bridge siam dan turte sawiho a ni. Mumal zawka Indo-Myanmar trade kalpui a nih theihna turin remchang hmasa berah India sorkara Ministry of External Affairs kaltlangin Joint Seminar on Bilateral Trade Potential, Mizorama buatsaih tura hmalak ni se, an ti.

Ramri kaltlanga insumdawn tawnna a nih dan tur ang taka kalpui a, danin a phal lohte ven kawnga ṭan lak a ngaih thute meeting-ah hian sawi lan a ni a; Zokhawthara Land Custom Station leh line department hrang hrangte hnathawhna hmun leh hmanruate mumal leh chak zawka chhawr a nih theihna tura tihchangtlung a ṭul tawha hriat a nih avangin, line department-te chu lo bawhzui tura tih an ni.

Meeting-ah hian Assam Rifles 23rd. Sector DIG Brig. Vinod S chuan ramria inkalpawhna, venhimna leh inṭhian ṭhatna siam tura Assam Rifles-te hmalakna hrang hrang a lem nen a sawifiah. Chief Secretary hi Commerce & Industries director J Hmingthan-mawia, Champhai DC Dr Naveen Aggarwal, Champhai SP Lalthiam­sanga Sailo leh sorkar official dangte'n an ṭawi­awm a; Land Custom Station, plant quarantine, police check-post, ware­house leh sorkar building pawimawh dangte an enfiah nghal a ni.