ICT Minister-in computer a sem

Information & Communication Technology minister Robert Romawia Royte chuan nimin khan Assembly conference hall-ah sikul 45 hnenah computer a sem.

Robert Romawia Royte chuan, computer-in zirnaah naupangte hma a sawntir a beisei thu sawiin, "Computer lamah an hriat la tam tâwk lo mah se, tumna leh taimakna nen inzir zel theih a ni," a ti a; zirlaite mai bakah, khawtlang tan computer-te chu hman ṭangkai ni se a duh thu leh, a ṭul a nih chuan fee-te lain computer awareness course pawh business model hmangin kalpui theih a nih thu a sawi.

Computer semna atan hian North Eastern Council (NEC) hnuaia IT Education Prog­ramme for Schools aṭangin cheng nuai 1,108 hmuh a ni a, implementing agency chu Mizoram State e-Governance Society a ni. Sikul 150 hnenah computer pek tura ruahman niin, a hmaa sikul 31 pek tawh leh nimina sikul 45 pek nen, sikul 76-ah pek a ni tawh a, sikul 74-ah pek leh tur a ni.