Officer eiru kum 5 táng turin hrem
Mizoram Civil Service (MCS) officer Lalrempuii Fanai chu State Institute of Rural Development (SIRD) sum eirua puh a nihnaah Special Court (Prevention of Corruption Act) chuan thiam loh a chantir a, kum nga chhung jail-a táng tur leh Rs. 5,00,000 chawi turin a hrem.
Court thurem danin, 1991 batch MCS Lalrempuii Fanai hi kum 2008-ah SIRD, Kolasib-a project director hna a chelh laiin Mizoram hmun hrang hranga hman tur computer 150 supply order tih chhuah a ni. Lalrempuii leh computer supply-tu Emperor, Aizawl-te chuan computer pakhat supply man Rs. 25,000 chu bill-ah Rs. 50,000 angin an ziak a, Rs. 25,000 chu zat leh zata insem turin an inremsiam tih Anti Corruption Bureau (ACB) leh sorkar ukilte chuan Court-ah an thlen. Computer 150 supply-naa sum hlêp rûk chu cheng Rs. 37,50,000/- a ni.
Prevention of Corruption Act tlawhchhana eiruk thubuai siamsak a nihnaah hian Special Court judge Thanglian Mang Guite chuan finfiahna a ṭha tâwkah a ngai a, thiam loh chantirin, nimin khan order a tichhuak a, kum nga chhung táng tur leh Rs. 5,00,000 chawi turin a ti ta a ni. Computer supply-tu Emperor erawh chu thuhretu (approver)-ah an ṭan avangin Court chuan a hrem tel lo.