MZP-in HSLC Top 10-te an chawimawi

MZP Gen.Hqrs. chuan nimin khan Vanapa Hall-ah HSLC Examination 2019-a top ten-a lang Mizo zirlai 20-te lawmpuina leh chawimawina hun an buatsaih a, School Education minister Lalchhandama Ralte khuallian a ni.

School Education Minis-ter chuan, kumin HSLC top ten-ah Mizo vek an lang chu lawmawm a tih thu sawiin, "Mizo zirlaite kan ṭhanharhna a niin ka hria a, hun lo kal leh zel turah pawh kan chhehvel hnam dang zirlaite elphak loh tura ṭhahnemngai taka in zir zel a ngai a ni," a ti a; HSLC top ten-a Mizo vek an lan hun a lo nghahhlelh ṭhin thu a sawi.

Lalchhandama Ralte chuan, kum dang aiin zirlai pass tlem zawk mah se, a pass chhunte an tih ṭhat zawk thu a sawi a, "Kum 2019 top ten-a Aizawl chauh ni lo, Mizoram hmun hrang hrang sikul aṭanga zirlai an lang hi a lawmawm. Sorkar sikul ṭhenkhat, zirlai pass miah lo awmna a awm erawh chu a pawi a, sorkar ang pawhin kan en zui dawn," a ti a; zirna-in hrang hranga zirtirtu indaih lohna Mizoram sorkarin a vei thu a sawi.

Sorkar sikula zirlaite top ten-a an lan loh chungchangah Lalchhandama chuan, chonaah ngai se a duh thu a sawi a, "Kum 2020-ah chuan sorkar sikul aṭangin top ten-ah lang thei ngei se ka duh," a ti. Hun rei lo têah Mizoram chief secretary tur Mizo an awm lo mai dawn tih sawiin Lalchhandama Ralte chuan, "DC-ah pawh a zahve aia tam chu hnam dang an ni tawh. Heng office pawimawh luah tur hian kan ram leh hnam nula tlangval awm thei se duhthusam a ni," a ti a, zirlaite hi kan ram mamawh chhanna ni tur chuan kan ngaihsan zawng te, kan duh zawngte kan thlak a ngai tawh tih a sawi.

School Education Minis-ter sawi danin, muster roll-a zirtirtu 946 lak turah advertisement chhuah a ni dawn a, training zo tawhte leh a tling ngeite chauh lak tum a ni. MZP president L Ramdin-liana Renthlei chuan, MZP-in chawimawina an buatsaih chhan sawiin, "Mizo zirlaite zingah inelna thianghlim awm se kan duh a, vawiina zirlaite hian Mizo hnam kal zel turah hian tih ve tur leh mawhphurhna thûk tak kan nei ve a ni tih hria se kan duh vang a ni," a ti.

MZP President chuan, Mizo pi leh pute luah chin ram humhalh a nih theih nan MZP-in hma an la zel dawn tih sawiin, Mizoram leh Assam ramri chhehvel ram, sorkar laipuiin a tu lam ve ve pawhin an khawih rih loh tura a tih chu Mizoram lamin an zawm ṭhat em em laiin, Assam lamin an zawm ṭha lo tih a sawi a, "Lote an vât a, huante an siam a, inte pawh an sa thar leh a ni. Sawiselna leh dodalna karah pawh kan ram kan chân belh zel loh nan kan bei zel dawn a ni," a ti a, MZP hmalakna thláwp turin mipui a sáwm.

HSLC top ten-a langte chawimawina inkhawm hi MZP vice president B Vanlaltána'n a kaihruai a; HSLC 2019-a pakhatna hnenah Rs. 10,000 pein, top ten-a lang mi dang zawngte hnenah Rs. 5,000 ṭheuh an pe a, lawmpuina dang eng emaw zat an pe bawk.