KHAWTHLIR

UPC (North East India)-a Aizawl East district chuan nimin khan Ramhlun South-a district building chung pandal-ah an kum 25-na, silver jubilee an lawm a, district superintendent Rev. Rosanga Kawlni-in jubilee lungphun hawngin, zanriah an kîlho nghal. UPC (NEI) Aizawl East district-ah hian pastor bial 30-ah member 25,000 chuang an awm a; zanin aṭangin Bethlehem biak-inah inkhawmpui vawi 25-na, silver jubilee an hmang ṭan leh ang.

Aizawl Book Fair vawi 11-na chu May 7, Thawhlehni khan Vanapa Hall-ah ṭan a ni a, Labour, Employment, Skill Development & Entrepreneurship director Lalhmunsanga Hnamte-in a hawng. Aizawl Book Fair hi a buatsaihtu ber chu Maggie L Ralte leh Bookline, Kolkata te an ni a, May 18, 2019 thleng a awh dawn a, ni tin chawhma dar 9 aṭanga tlai dar 6 inkarah tlawh theih a ni ang.

Nimin khan Aizawl DEO Vanlalngaihsaka hoin official-ten DC conference hall-ah Lok Sabha MP inthlanpui leh Aizawl West-I MLA by-election-a vote tlate May 23, 2019-a chhiar dan tura ruahmanna awmte an thlirho.

Chief secretary Lalnunmawia Chuaungo chuan nimin khan Champhai-Zokhawthar World Bank Road siam mektu TARMAT company hotute a kâwm a, an kawng siam mek chu kawng pawimawh tak a nih avangin, hmanrua leh thawktu tam zawk chhawra chak taka thawk turin a chah. An hmasawnnate thla khat hnuah a hnena thlen turin a hrilh bawk.

YMA Sub-Headquarters, Serchhip chuan Environment, Forest & Climate Changes department leh CYMA hnuaia Science & Enviroment Sub-Committee te nen ṭanghoin May 7, Ningani zan khan Serchhip P&E Veng YMA Hall-ah sik leh sá inthlak danglam zel chungchang zirhona an buatsaih a, Serchhip khawpuia YMA branch hrang hrang hruaitute an tel. Awareness campaign-ah hian CYMA Science & Enviroment Sub-Committee secretary Prof. Lalnuntluanga chu resource person a ni.