Aizawla lirthei intlân chhâwk dan turah Traffic SP-in hriattirna a tichhuak

Coordination Committee on Traffic Management hotute April 25, 2019-a ṭhukhawmin Aizawl khawpuia lirthei intlân chhâwk dan thar an rel bawhzuiin Traffic SP Rodingliana Chawngthu chuan nimin khan hriattirna a tichhuak a; intlân chhâwk chuan mimal motor leh sorkar motor zawng zawng, phalna pek bikte tih loh chu a huam vek tur thu a tarlang.

Traffic SP-in hriattirna a chhuah danin, "Aizawl khawpuia lirthei tâwt lutuk tihziaawm nan Aizawl khawpui (AMC area) chhungah June 2019 chhung atan lirthei intlân chhâwk / indin chhâwk dan thar enchhin turin thupek chhuah a ni," a ti.

Traffic SP-in intlân chhâwk dan tur a tarlan chu, lirtheite chu an registration number tàwp bera number zat azirin tlân chhuah theih loh ni siam a ni. Motor registration number 1 leh 2-a tawpte chu Thawhṭanniah an tlân chhuak thei dawn lo a; 3 leh 4-a tawpte chu Thawhlehniah, 5 leh 6-a tawpte chu Nilainiah, 7 leh 8-a tawpte chu Ninganiah leh, 9 leh 0-a tawpte chu Zirtawpniah an tlan chhuak theih dawn lo a ni. Tlân chhuah phal loh hun hian chawhma dar 9 aṭanga tlai dar 5:30 inkar a huam ang.

Mizorama district dang leh Mizoram páwna register private motor, Aizawla awm leh tlân lut turte pawh intlân chhâwk hian a huam dawn a; Inrinni, Pathianiah leh sorkar holiday-ahte erawh chuan ding tur bik awm loin, tlan chhuah vek theih a ni dawn.

Taxi-te chu sticker A, B leh C hmanga an intlân chhâwk mek angin chawhma dar 9 aṭanga tlai dar 6:30 inkarah intlân chhâwk zel tur a ni. Inrinni bikah chuan chawhnu dar 1 aṭangin taxi zawng zawng tlân chhuah phalsak a ni dawn a, Pathian­ni leh sorkar holiday-ahte pawh taxi zawng zawng tlân chhuah vek theih a ni ang.

Lirthei tlân ní ni loa emergency thil leh ṭul bik thila tlân chhuah ngaiah chuan, Aizawl Traffic Control Room phone number 0389-2322307, 2313061, 9366553559 leh 9774440722-ahte hriattir tur a ni tih Traffic SP chuan a tarlang a; "Thupek zâwm lo mante chu MV Act, 1988 Section 179 hmanga hrem an ni ang," a ti.

1.    Governor, Chief Minister, Speaker (an carcade tiamin).

2.    Public service vehicle (passenger phur chi lirthei) - e.g. city bus/bus, maxicab (state dang register huamin), auto-rickshaw, institution bus, sorkar department bus, two wheeler taxi.

3.    Police department motor duty, traffic police duty, Fire Service motor, Excise & Narcotics motor duty, Medical & Hospital emergency duty, ambulance/morgue van, executive magistrate, law & order duty leh emergency duty, journalist (MJA sticker tárte chauh), PHE emergency duty leh PHE tuisem, Power & Electricity emergency duty, bawnghnute sem, chanchinbu sem, AMC hnuaia bawlhhlawh paih (garbage) motor duty, army leh para-military force, government department/office despatch rider.

4.    Rualbanlote tana special vehicle.

5.    District dang aṭanga sorkar thil pawimawha duty, law & order leh essential commodity duty-te chu Aizawl Traffic Police-te an hrilh hmasak hnuah ngaihhnathiam an ni ang.

6.    Lirthei 407 (truck) leh a chung lamte NH-54 Bawngkawn-Zemabawk inkara tlan dan tur Traffic Police-te'n an ruahman sa anga tlan tlang turte.