Sports Policy chungchang sawiho a ni

Sports & Youth Service (SYS) department chuan nimin khan Dawr­pui Multipurpose Centre-ah Mizoram Sports Policy chung­changa inràwn khawmna an buatsaih a, SYS minister Robert Romawia Royte-in a hmanpui.

Robert Romawia chuan, sports policy chu sorkarin sport a kalpui dan tur a nih tawh dawn avangin, SYS department chauh ṭan chu a tâwk dawn lo tih a sawi a, "A kaihhnawih department-te an ṭan ve a ngai dawn. Chu chu sports policy atan a pawimawh a ni. Association tih tur te, sorkar tih turte kan duang dawn a ni," a ti.

Training-na leh tournament khelhna hmun hran neih a ṭul thu sawiin Sports Minister chuan, "Ṭhenkhatin tournament buatsaihna atana hall ṭha an hmang thei lote hi tihbo a ngai. Infrastructure pawh kan ti zel ang a, chutihrualin, a game tihhmasawn lamah kan ṭan zual a ngai," a ti a; professional zawnga infiamna kalpui an tum thu a sawi.

SYS Minister chuan, sports policy-ah association-te pawhin kalphung mumal zawk an zawm ve tur telh an rilrûk thu sawiin, "Sorkarin a duh duha association-te a tih theihna tur lam a ni chuang lo. Association hruaitu inthlak apianga kalphung thlak vakte hi a ṭha lo a, association-te mumal zawka an kal theih dan tur ngaihtuah ṭul kan ti a ni," a ti.

Inràwn khawmna hun hi SYS director Zo­thanmawia'n a kaihruai a, sport association hrang hrang hruaitute an tel. SYS joint director John Ṭanpuia'n Sports Policy of Mizoram tura an duan chhin leh an hmalaknate a hrilhfiah a ni.