MNYF-in Agriculture Minister an chhan

MNF ṭhalaite chuan thu­chhuah siamin, tunlaia Mizorama pangang puang, fall armyworm chung­changah Congress ṭhalaite'n thu dik tâwk lo hmangin  Agriculture minister C Lalrinsanga an bei niin an tarlang a; dâwt hmanga inbeihna awm tawh lo se an duh thu an sawi.

MNYF chuan, fall armyworm chu Congress sorkar lai, kum 2018-ah hriat ṭan a ni tawh nia sawiin, "Congress sorkarin a ngaihsak lo a, state dang chuan nasa takin hma an la tawh. February 2019 khan Delhi-ah zonal conference neih a ni a, state tinte chu hrilh lâwk an ni," an ti a; MNF sorkar a din hnuah chak taka hmalak a ni a, District Agriculture Officer (DAO) tinah hriattirna chhuahin, fall armyworm chu thlîthlai tura tih niin an tarlang.

Fall armyworm laka inven lâwk dan a awm lo nia sawiin MNYF chuan, "A lo puan tâk thut avangin department officer-te pawh hmun hrang hrangah an feh chhuak nghal a, office hna thawk zawng zawng feh chhuah a rem loh avangin Rapid Response Team din nghal a ni. Minister-in office lama ruahmanna siam tur leh a hmuna feh chhuak tura rua­hmanna a siam hi thlamuanthlak kan ti a, Central lama ṭanpuina tur a buaipui nghal hi a ropui kan ti hle a ni," an ti.

MNF ṭhalai chuan, lo neitute ngaihsak lo anga MPYCC-in Agriculture Minister an sawi chu lo neitute hmakhua ngaih vang ni loin, politics-a hamṭhat tumna vang a nih thu an sawi a, "Minister hian kut hnathawktute a ngaihsak a, lo neitute a hmuna tlawhna tur programme tam tak duan sa nei mah se, Model Code of Conduct-in a phuar avangin a tlawh thei ta rih lo a ni," an ti. "Pangang puang hi khuarêl chhiatna a ni a, khuarel chhiatna hi tu dan theih mah a ni lo," an ti bawk.