MJA-te'n Lawngtlai EMRS an enfiah

MJA, Lawngtlai district member-te chuan nimin khan Lawngtlaia Eklavya Model Residential School (EMRS) sak mek tlawhin an enfiah. A satute chuan, hna thawh tur zinga 75% vel zawh a nih tawh thu an lo hrilh.

Lawngtlai district MJA-te hi an president Lalngheta Ralte hoin an thawk chhuak a; Lal­ngheta Ralte chuan, MJA-te'n district chhung­a sorkarin hmasawnna hna a thawhte an en ṭhin thu sawiin, "MJA-te hi sorkar aṭanga endiktu ni lo mah ila, ram hmasawnna tura hna awm reng reng chu ṭha taka thawk turin kan duh a ni," a ti a, hna thawktute chu ṭan la sauh sauh turin a ngen.

EMRS sak hna thawktu NECS-a field manager Lalsangzuala chuan, kalkawng ṭhat tâwk loh vang leh power supply lamah harsatna an neih avangin an duh angin hna an thawh chak theih loh thu a sawi a; electric connection mumal tak a la awm lo a, temporary connection chauh an neih thu leh, generator 15Kv hmanga hna an kalpui avangin harsatna an tawh thu a tarlang.

EMRS, Lawngtlai hi February 2017-ah sak ṭan a ni a, tun dinhmun­ah hna thawh tur zinga 75% zawh a ni tawh. Academic session tharah pawl 6-8 thleng zirna ṭan theih turin buaipui mek a ni. A sak nan cheng nuai 1,600 rua­hman a ni a, in 12 awm tura tih a ni.