Hnam dang contractor leh supplier A tlem thei ang chhawr kan duh - CM

Mizoram Engineering Service Association (MESA) chuan nimin khan CIRA Garden, ITI Vengah inkhawmpui an hmang a; khuallian, chief minister Zoramthanga chuan, Mizoram sorkarin hnam dang contractor leh supplier a tlem thei ang ber chhawr an duh thu a sawi.

Chief Minister chuan, sorkarin Mizo contractor leh supplier-te hna lian thawk thei tura hlânkai (upgrade) a duh tih sawiin, "Hna lian an khawih theih nan ngaituahna sên a ṭul. Works department pawhin an rilruah lo nei se ka duh. Sorkarin hnam dang contractor leh supplier-te a tlem thei ang ber chhawr leh hman a duh a ni," a ti.

Hna thawhte enkawl zui (maintenance) chu a vei leh a thupui a nih thu sawiin Zoramthanga chuan, engineer-te chu khawl enkawl kawngah ṭan la thar a, hman tlak loha a awm loh nan siamṭhat leh enkawl ngai pawimawh turin a chah.

Chief Minister chuan, Mizoramin kawng engkimah Pathian malsawmna a dawn thu sawiin, "Kan hausaknate hi thil tih theihna leh hnathawh theihna ṭha tak a ni. Hengte hmang hian Zoram hi hnute tui leh khawizu luanna ramah kan siam thei. Mahse, chumi tihlawhtling tur chuan kan rilru sûkthlêk leh ngaihtuahna kan thlâk a ngai a ni," a ti. 

Mizoram Engineering Service aṭanga secretary hna chelhte'n technical department lian zual hun rei tak an chan tawh loh chungchangah Zoramthanga chuan, "Secretary-te hna chanpual sîksawi hunah technical department lian pakhat tal chu sorkarin a chantir dawn," a ti a; department hrang hranga post hnawhkhah loh tam tak chu vawi leh khata hnawkkhah vek theih a nih loh thu a sawi.

Chief Minister hian MESA-in journal (chanchinbu) an siam 'Zoram Ruhrel - The MESA Journal 2019' chu a tlangzarh nghal a ni. MESA inkhawmpui hi an president Bowman-a'n a kaihruai a, an member nikum leh kumin inkhawmpui inkara thi mi pahnih sûnna hun an hmang. Pension-a chhuak mi 11-te thlahna thuchei an hlan a, grade hrang hranga kaisang an member 40-te lawmpuina an pe bawk. MESA hi May 14, 1972-ah din a ni a, member 400 chuang an awm mek a ni.