BADP sum hman dan chhui turin Congress-in Lokayukta-ah a thlen

Mizoram Pradesh Congress Committee (MPCC)-a Legal department chuan Rural Development department-ah eirukna a awm ngei nia ngaiin nimin khan Mizoram Lokayukta-ah complaint a thehlut.

MPCC Legal department tarlan danin, CAG Report No. 2 of 2018-ah Rural Development department-ah eirukna a awm ngei tih a inziak a, chu chu chhui chhuak a, a mawhphurtute dan anga hrem turin Lokayukta chairman C Lalsawta hnenah complaint a thehlut a ni.

CAG report-a a lan danin, Mizorama international border nei district paruk zinga district pahnih - Lunglei leh Champhai district-te chhui a ni a, district pahnih chhungah pawh chuan RD block pasarih awmah block pahnih chauh an thlang chhuak leh a ni. 

RD block pahnihah chuan khua 77 a awm a, mahse, khaw 24 chiah a thlang chhuak leh bawk. Khaw 24 leka RD department-in BADP sum a hmanna chu chhui a ni a, sum leh pai fel lo leh dik lo taka hman tam tak a awm a ni. He thilah hian CAG report chuan, FIR thehluh a rawt bawk.

CAG Report chu March 13, 2019-ah Assembly House-ah pharh a ni tih sawiin MPCC chuan, "Tuna sorkar lai hian FIR thehlutin, a ṭul anga hma an lak kan beisei laiin, tun thlenga hmalakna hmuh tur a awm tâk loh avangin MPCC Legal department chuan hetianga mipui sum tam tak dik lo taka hmangtute hi zawn chhuah a, dan anga hrem an nih theih nan hma a la ta a ni," a ti.