Khaw 2-ah in a kâng, mi 5 hliam

May 8, Nilaini zan dar 6:30 vel khan Serchhip Zozam Venga medical quarters pakhat a kâng a, bungrua chuh hman lohin a kâng ral a, kâng ṭhelhtu mi panga hliamin, pathum chu damdawi-inah dah luh an ni.

Serchhip aṭanga thu dawn danin, quarters kâng hi Health department driver PC Lalromawia te chhungkaw luah lai a ni a, inhnuaia ar vulhna atana an hman aṭanga kâng ṭan a ni. Kângmei a chhuak tih hriat a nih veleh Fire & Emergency Services hriattir nghal a ni a, thli a tam avang leh kângmei chu a chak avangin vanduaina thlenna hmun an thlen chuan ṭhelh ngaihna a awm tawh lo.

Kâng ṭhelh pawlin kângmei ṭhelh tuma an beih mek laiin eirawngbawlna gas bûr a puak a, mi panga hliamin, chu'ng zinga pathum chu Serchhip District Hospital-ah admit an ni. Damdawi-ina dahte chu - Lalchhuanawma (36), Zozam Veng, Vanlalpeka (26), Vengchung leh Huntharmawia (19), Vengchung-te an ni.

Kangmeiin a tihchhiat in leh bungruate nimin khan Serchhip-I VC leh Serchhip Vengchung Branch YMA ṭangkawp huaihawta senghawi a ni a, kangmei tuarte chenna atan Serchhip Medical Complex-a quarters pakhat chu chei ṭhat  nghal a ni.

Kangmei tuarte tan hian bialtu MLA Lalduhoma'n Rs. 3,000, adviser to chief minister C Lalramzauva'n Rs. 2,000, Salvation Army-in Rs. 4,000, MNF Ṭhalaiin Rs. 1,000, CMO Office staff-in Rs. 2,000, Vengchung Presbyterian Kohhranin Rs. 10,000, DC Office-in Rs. 3,000, State Bank Manager-in Rs. 2,000 leh Apex Bank-in Rs. 1,000 an pe. Bialtu MLA hian in kang vanga hliam tuarte a kan nghal.

Nimin chawhma dar 11 vel khan Mamit district-a Khawhnai khuaah Lalhmunmawia in, Assam type a kâng bawk a, bungrua chuh hman loin a kâng ral. Khawhnai khawtlang chuan nimin ṭang khan chhawmdawl hna an thawk ṭan nghal a ni.