Sewage Treatment Plant 79% zo tawh

Aizawl khawpui thlî leh septic tank-te awmze nei zawka sâwngbawlna tura project kalpui Sewage Treatment Plant hnuaia hnathawh mekah hna 79% thawh zawh a ni tawh.

Sewage Treatment Plant hi SIPMIU hnuaia siam a ni a, SIPMIU nodal department, UDPA secretary Dr C Vanlalramsanga hnen aṭanga Vanglaini thu dawn danin, Chite venga bawlhhlawh sawngbawlna tur hmun (treatment plant) bik chu peih a ni tawh a, network (pipeline) peih a la ni lo. 

Treatment plant-ah hian thlì chi hrang hrangte leh bawlhhlawhte sâwngbâwlin leiṭha siam chhin a ni tawh a, ṭha takin leiṭha siam theih a ni. Aizawla hmun ṭhen-khatah an venga pipe phûm duh lo an awm avangin an beisei angin hna an thawk chak thei lo a, chuti chung chuan hna thawh zawh a ni ṭêp tawh. Hna thawh zawh a nih veleh Sewage Treatment Plant chu enchhin a ni dawn a, enchhin zawhah pipeline leh in hrang hrangte thli paihna tur zawm hna thawh a ni ang.

Tun ṭuma Sewage Treatment Plant project hi phase-I a ni a, Aizawl mipui hmun ngaa ṭhena hmun hnih vel a huam a ni.