Motor hâl ṭhina puhte man an ni

Tun hnaia Lawngtlai khawpui chhung hmun hrang hranga lirthei eng emaw zat kângte hâltu nia puhte chu tun hnai khan Lawngtlai police-te'n an man. Lirthei hâltua puhte hmel hmuh duhin nimin khan mipui ṭhahnem tak Lawngtlai Police Station kawtah an pungkhawm a, buaina lian chhuak a awm lo.

Lawngtlai aṭanga thu dawn danin, Lawngtlai khawpuia zan rei lama lirthei eng emaw zat kânga mawhphurtua puh Chakma pahnih - Suraj Kumar (29) s/o Lushai Mohan, Longpuighat leh Bruce Lee (24) s/o Joyanto Chakma, Longpuighat-te chu May 5, 2019 zanlai pelh hnu, dar 2:30 velah Central YLA duty-te'n an man a, Police hnenah an hlan nghal. Mi pahnihte chu District Court thu angin judicial custody (jail)-ah dah an ni tawh.

Police-te chuan May 8, Ningani khan lirthei hâltute zinga tel vea puh Rajkumar @ Vanlalmawia (38) s/p Lushai Mohan, Longpuighat chu an man leh a, nimin lamah District Court-a kalpui an tum mek laiin man a nih thu mipuiin an hria a, hmuh tumin Police Station kawtah an pungkhawm a ni. Lawngtlai Council Vengah chuan veng mipuite Lawngtlai PS-a kal khawm turin an inhriattir niin thu dawnna chuan a sawi.

Lawngtlaia chanchin-bumite'n Vanglaini an hrilh danin, Lawngtlai PS-a mipui pungkhawmte chu an duh angin Rajkumar @ Vanlalmawia hmel hmuhtir an ni a, chumi hnuah mipui tam zawk chu an ṭîn a, rei lo tê chu innawr hlek awm mah se, buaina lian tham a thleng lo. Lirthei hâltua puhte hi Lawngtlai PS-ah thubuai siamsak an ni.

Lawngtlaiah hian March 4, 2019 zan dar 11:30 velah Areopagy bula dah bike pakhat hâl a ni a, bike bula car pakhat a kâng chhe nual bawk. March 31 zan dar 12 velah Lawngtlai Bazar YLA Hall hnuaia dah bike leh gypsy a kâng. April 19 zing dar 1:30 velah Chandmary Venga NH-54 kawngpui síra dah scooty pahnih leh bike pakhat chu hnûk khawmin, hâl a ni a, a piah deuha i10 car a kâng bawk a ni.

April 19 zanah vêk Lawngtlai PS pêng, Bazarah Royal Enfield bike hâl a ni a; May 1, 2019 zan dar 12:30 velah Lawngtlai Chandmary-ah scooty pakhat hâl leh a ni bawk.