Minister-in pangang chêtna hmun a tlawh Loneitute'n cheng nuai 647 vel an chán dawn

Agriculture minister C Lalrinsanga chuan nimin khan Leitan, Durtlang leh Sihphira pangang chi khat, fall armyworm-in vaimîm a ei chhiatna hmunte a tlawh. Fall armyworm avang hian Mizoram puma loneitute'n cheng nuai 647 vel an chán dawna chhût a ni.

C Lalrinsanga chuan, fall armyworm vanga harsatna tâwk loneitute a tawrhpui tak zet tih sawiin, "Pangang puang hi hriat a nih veleh district hrang hranga Agriculture department-a thawkte'n pisaa awm hman lo khawpin hma an la char char a, chumi hnuah State Rapid Response Team din a ni. Department-in fall armyworm doin rim tak leh tih tak zetin an thawk. Damdawia kahin awmzia nei mah se, vên hneh a har em a ni," a ti.

Pangang puang chungchangah sorkar laipui biakpawh nghal a nih thu sawiin Minister chuan, "Thlai chîn loh hun (plant holiday) puan emaw, loneitute thlai chîn bik (crop suggestion) neihtir an rawn rawt. Mahse, fall armyworm hian thlai chi hrang 80 chuang chaw atan a rin theih avangin, thlai chîn tur thlan thiam a har khawp mai," a ti a; hmalak zel dan turah department-in ngaihtuahna uluk taka an sên thu a sawi.

Agriculture Minister chuan, sorkar laipui chu vaimîm enkawlna atana sum senso turah a inhuam thu sawiin, "Kan Chief Minister pawh a inhawng zau hle. Fall armyworm hi ram changkang zawk pawhin tih ngaihna an hre lo. He thil thleng hi kan duh vang a ni lo a, khuarel chhiatna a ni. Inbeihna chi a ni lo a, ṭanrual a ngai. Indem hman kan ni lo a, Mizo anga kan ṭanrual a ṭul hun a ni," a ti.

Hmun ṭhenkhatah chuan damdawia kahin awmzia a neih thu sawiin C Lalrinsanga chuan, "Hmun ṭhenkhatah chuan department hmalakna azárah pangang thi bâk hmuh tur a awm lo. Chutih rualin, hlawhtling anga kan inngaih laiin, hmun dang aṭangin a lo kal leh thei," a ti a; fall armyworm chu damdawi ringawt ni loin, loneitute'n vaimimte endika an thah zel a pawimawh thu a sawi.

Minister ṭawiawmtu Agriculture director Rohmingthanga Colney chuan, fall armyworm kahna tur damdawi a thlawnin loneitute an pek thu sawiin, "District tinah an mamawh zat ang damdawi leina tur sum awm ang angin kan pe. Pesticide hi hman fimkhur a ngai hle a, pesticide hmanga vaimim kah leh a bul vela thlaite chu ni 15 hma chuan ei loh tur. Fall armyworm hian Mizoram chhung a tuam chhuak vek a ni," a ti.

Rohmingthanga sawi danin, Agriculture department-in May 6, 2019 thlenga report an dawnah, fall armyworm-in ram hectare 2,055-a zaua vaimim a ei chhe tawh a, chhungkaw 5,039 a tibuai tawh. Fall armyworm-in a ei chhiat vaimim zawng zawng chu an nung zui lo a nih chuan loneitute sum hloh tura chhût chu cheng nuai 647 vel a ni.

Indian Institute of Maize Research (Ludhiana), National Centre for Integrated Pest Management (Delhi) leh National Bureau of Agricultural Insect Resources (Bangalore)-a mithiamte May 15, 2019 khian Aizawlah an lo kal dawn a, fall armyworm chêtna hmun tlawhin an zir chiang dawn a ni.