KHAWTHLIR

Mizoram SSA Tea­chers' Association chuan, May 8, Nilaini tlai dar 3-5 inkar khan Mizoram pum huap ṭawngṭai rual inkhawm an nei. Mizoram hmun hrang hranga SSA hnuaia zirtirtute chuan Pathian hnena inhlan tharna an nei a, Mizorama zirnain hma a sawn zel theih nan te, School Education department-a thawk zawng zawng tan te, Mizoram sorkar kaltlanga an service a ṭha zawnga a inher theih nante an ṭawngṭai a ni. SSA hnuaia zirtirtu mi 2,000 chuang an tel niin an sawi.

Chaltlang Higher Secon­dary School NSS chuan nimin khan an sikulah blood donation camp an huaihawt a, Synod Hospital tan thisen unit 45 an pe a, a petute mipa 37 leh hmeichhia pariat an ni.

May 4, 2019 khan Ngopa tlangval Lalzarmawia (30) s/o PB Zosanga ruang chhar a ni a; mi kut tuara thi ni ngeia an ngaih avangin Ngopa NGO Coordination Committee chuan chhui chiang turin thuneitute an ngen. Lalzarmawia thia hmuh a nih a, a taksa awm dan enin, mi kut tuar ngeia thi a nih an rin thu sawiin, "Pawi khawihtute hi sorkarin man chhuakin, an phû tâwk hremna pe ngei se kan duh tak zet a ni," an ti.

MZP leh Mizoram Chess Association chuan nimin aṭang khan Dawrpui Multipurpose Center-ah MZP 8th. Mizoram Inter-School Chess Cham­pionship 2019 an buatsaih ṭan a, zirlai ṭhahnem tak an tel. He inelnaa tel naupangte chu category pali - higher secondary section (class XI & XII), high school section (class IX & X), middle school section (class V - VIII) leh primary section (class IV hnuai lam)-ahte ṭhen an ni a; May 10-ah zawh a ni ang.

Mizoram University-a Department of Political Science leh India Council of Social Science Research, New Delhi-te chuan nimin aṭang khan MZU-ah ‘Governance and Development in Mizoram: Role of Multiple Stakeholders and Public Policy’ tih thupui hmangin national seminar an buatsaih a, MZU vice chancellor Prof. KRS Sambasiva Rao-a’n a hmanpui. Seminar hi vawiinah chhunzawma zawh a ni ang.