ICFAI Chancellor haw tur dan tumin Aijal Club kawtah zirlai an pungkhawm

ICFAI University, Mizoram Students’ Action Committee (IUMSAC) huaihawtin ICFAI University, Mizorama zirlaite leh thawktute chu nimin khan ICFAI University chancellor JP Ramappa haw tur dan tumin Aijal Club kawtah an pungkhawm a, mahse, an dang thei lo. IUMSAC hruaitute chuan, an mamawhte tihhlawhtlin a nih hma chuan an theih tawka hma an lak zel dawn thu an puang.

ICFAI University, Mizoram zirlaite leh thawktute chu Chancellor dan tumin chawhma dar 10 velah Aijal Club kawtah an pungkhawm a, Chancellor chu an dang thei lo a, kawng dang aṭangin a chhuak a, Mizoram a chhuahsan thei nia thu dawn a ni. Zirlaite chu an thil phût chi hrang hrang hmangin an au rual a, chhun dar 12 pelhah an ṭîn darh.

Nimin chawhnu dar 1 pelhah khan IUMSAC hruaitute leh ICFAI University, Mizoram Employee Forum hruaitute'n Aizawl Press Club-ah thuthar thehdarhtute an kâwm a; an lungawi lohnate leh an thil phûtte an sawifiah.

IUMSAC President chuan, Mizoramah ICFAI University din a nih theih nan hian MNF sorkar hmasak hun laiin Mizoram State Legislative Assembly-ah The Chartered Financial Analysts of India University Mizoram Act, 2006 pass a nih thu a sawi.

Zawhna chhangin IUMSAC hruaitute chuan, chief minister Zoramthanga leh ICFAI Society hotute tun hnaiah an inbiaknaah, ICFAI puih nan Chief Minister chuan Mizoram sorkar sum cheng vbc. 2.5 vel pek a sawihmuh nia an hriat thu a sawi a, "Hei hi ṭha kan ti lo, a chhan chu, Mizoram sorkar sum pek hi kan thil phûtte a hlawhtlin phahna tur a ni lo a, kan duh lo a ni," a ti.

IUMSAC president Lalnunpuia sawi danin, kum eng maw zat kal ta aṭangin zirlaite'n harsatna tam tak an tâwk tawh a, faculty-te'n ziakin ICFAI Society, Hyderabad-ah lehkha an thawn tawh ṭhin. An harsatna tawhte chu - fee to uchhuak, class room indaih lohna leh ṭha tâwk lo, library changtlung lo, bus indaih lo, internet chang­tlung lo leh, health centre leh sports facility mumal lote a ni.

An thil phût avang hian March 28, 2019-ah ICFAI University, Mizoram campus-ah lungawi lohna an lantir a, hmasawnna an hmuh loh avangin April 23, 2019-ah lungawi lohna lantir lehin, Hyderabad aṭanga prospectus thleng thar an hâl.

May 7, Thawhlehni khan ICFAI University, Mizoram campus, Durtlang North-a mi chu ICFAI Society aṭanga lo kal chancellor JP Ramappa-a'n tlawh a tum a, zirlaite leh thawktute'n pawndum nen an lo hmuak. Hei vang hian Chancellor chu a let leh a ni.

May 7-ah vêk IUMSAC hruaitute leh ICFAI University Employee Forum hruaitute'n Chancellor chu a thlenna Aijal Club-ah kal chilhin memorandum an thehlut a; Chancellor chuan zirlaite leh thawktute thil phûtte a tihhlawhtlinsak theih loh tur thu a lo hrilh.

May 8, Nilaini tlaiah Aijal Club kawtah ICFAI chancellor JP Ramappa thlalak (poster) an hâl a; nimin khan a haw tur dan tumin Aijal Club kawtah an pung khawm leh a ni. Lalnunpuia chuan, thawktute hlawh chungchang chu Administrative Manual-ah inziak mah se, tun thlengin UGC Norms angin hlawh an dawng lo tih a sawi a, "An la dawng lo mai ni loin, dearness allowance leh medical reimbursement pawh kan nei lo. Thawktute tan career advancement scheme a awm lo a, qualification inang leh luh hun inangah pawh hlawh a inang lo zung mai a ni," a ti.

An harsatnate ICFAI Society-a an thlen fo chungin ṭawng­ka emaw, ziakin emaw chhanna an dawng ngai lo tih sawiin Lalnunpuia chuan, "Zirlaite leh thawktute kan harsatna min sutkian a hnêka a rûka kan Chancellor-in min hawsan hian kan rilru a tináin kan hrilhhai tak zet a ni," a ti a; ICFAI Society-in an harsatna a sutkian theih loh takah chuan, an harsatnate chu Mizoram sorkarin a rang lamin chinfelsak se an duh thu a sawi.