Dr K Beichhua-a'n a department Hmalakna hrang hrangte a tlawh

Minister of state Dr K Beichhua chuan nimin khan a department chan AH&Vety leh Social Welfare hnuaia Kelsih, Thenzawl leh Serchhipa hmalakna hrang hrangte a tlawh.

Dr K Beichhua hian Social Welfare department-in Kelsih dáia Tribal Research Institution cheng vbc. 20 chuang senga an sak ṭan mek a tlawh hmasa ber a; Tribal Research Institution-ah hian Zawlbuk, administrative building leh building dang eng emaw zat a awm dawn a ni.

Thenzawla AH&Vety Complex a tlawhnaah Dr K Beichhua hi general manager Dr F Lalramhluna leh a thawhpuite'n an lo dawngsawng a; Dr K Beichhua chuan theih­tawpa ṭan lak a tum thu sawiin, "Mahni zawn ṭheuhah theihtawp chhuah ila, department staff-te hi hmasawn turin ngaihtuahna hmang tur­in ka duh che u. Sorkar hmasa thil tih a ṭhate chu tih zuia chhunzawm zel kan tum," a ti.

Dr F Lalramhluna sawi danin, AH&Vety department-in Thenzawlah ran chaw chînna hmun, ram hectare 25-a zau a nei a, Aizawl leh a chhehvela ran vulhtute hnenah an hralh ṭhin. Complex-ah hian ar, bawng leh kêl eng emaw zat an vulh nghal bawk.

AH&Vety Complex a tlawh zawhah minister K Beichhua chuan Ser­chhipa Eklavya Model Residential School (EMRS) a tlawh leh a, an dinhmun a enfiah a ni.