Fall armyworm chetna MJA-te'n an tlawh

Serchhip district MJA member-te chuan nimin khan pangang chi khat, fall armyworm-in vaimim a ei chhiatna hmun, Hriangtlang khuaa vaimim hmun an tlawh a, Agriculture department hotute'n thil awmzia an hrilhfiah.

Serchhip MJA-te hian Hriangtlang khuaa C Darmawia vaimim hmun an tlawh a, Darmawia te hian nikumah vaimim chi kg. 5 vel chíngin, vaimim quintal 5 chuang an thar a, kumin buh ṭín thum hmuna zauah vaimim chi kg. 3 vel an chíng leh a ni. An vaimimte chu fall armyworm-in an beih avangin Agriculture department aṭangin vaimim chî an lak belh thu a sawi.

Serchhipa Agriculture subject matter specialist Lalringliana chuan, fall armyworm-te chu ni 23 velah an puitling hman a, anmahni thlahtu phengphehlepte'n ṭum khatah 100-200 vel an tui theih thu a sawi a ni.