SC-in Rahul-a laka petition thehluh hnawl

Supreme Court chuan Cong­ress president Rahul Gandhi-a citi­zenship chung­changa petition thehluh chu ngaih­tuah tlakah  ngai loin a hnawlsak. 

Petition hi Delhi-a cheng mi pahnih Jai Bhagwan Goyal leh Chander Prakash Tyagi-te thehluh a ni a, Rahul Gandhi chu British citizen a ni em tih tichiang tura sorkar hriattir tur leh, a citizenship chungchanga zawhna awmte chu chinfel a nih hma chu Lok Sabha inthlan neih meka Amethi leh Wayanad biala inthlan a chuh ve chu remti lo turin an ngen a ni. 

Goyal leh Tyagi-te chuan petition an thehluhah hian 2005-06 a UK-based company annual data form an thil tel a, hetah hian Rahul Gandhi chu British citizen anga ziah a ni. Thla hmasa khan BJP MP Subramanian Swamy chuan British citizen anga tarlan a nih chungchangah Rahul Gandhi lakah hian complaint a lo thehlut tawh bawk a, sorkar chuan hei hi ni 15 chhunga chhang turin Gandhi hi a hriattir a ni. 

Chief Justice Ranjan Gogoi kaihhruai Supreme Court bench chuan nimin khan Rahul-a laka petition thehluh hi ngaihtuahin, "Com­pany ṭhenkhatin British citizen anga an ziah avangin British citizen a nih phah ta em ni?" tia zawt letin petition hi a hnawl a, petition an thehluhnaa an innghahchhan chu rin tlak loah a ngai.

SC hian nimin vek khan Varanasi Lok Sabha biala din tum, BSF sipai hlui Tej Bahadur Yadav-a'n a nomination paper hnawlsak a nih avanga Election Commission a khinna chu a hnawlsak bawk. CJI Gogoi kaihhruai bench chuan Yadav-a thil phut hi ngaihtuah zuina chhan tur ṭha tawk an hriat loh thu an sawi.