ACB-in complaint 10 dawng

Mizoram sorkara Anti Corruption Bureau (ACB) chuan kumin 2019 chhungin complaint 10 an dawng tawh a, chu'ng zinga pahnih chu Mizoram Lokayukta-in complaint an dawn, ACB hnena an hlan chhâwn a ni.

ACB hian complaint an dawnte chu an chhuizui hnuah Vigilance department-ah an thawn a, Vigilance chuan criminal case-a kalpui tur leh department inquiry-a kalpui tur leh thubuai tihtawp turah thutlukna an siam ṭhin. ACB chuan kumin chhunga complaint an dawn 10-te chu Vigilance department-ah an thawn tawh a ni.

Vigilance department ACB aṭanga case an dawn 10 zinga pali chu kalpui zel a nih dan tur ACB an hriattir tawh a, parukah erawh thutlukna an la siam lo. Thutlukna an la siam loh zingah Lokayukta-in ACB-a an pek chhâwn complaint pahnih pawh a tel.

Kumin chhung vêk hian ACB chuan thubuai pahnih an chhui zo tawh a, an thubuai chhuina report (chargesheet) pawh Court-ah an thehlut tawh a ni.