MLPC hmanga zu zawrh A tawp tak tak tawh

Excise & Narcotics department (END) chuan, Mizoram Liquor (Prohibition and Control) Act 2014 (MLPC Act) tlawhchhana zu dahkhawlna (bonded warehouse)-te leh zu dawr (vendor)-te'n an zu neih sate an hralh zawh tawh avang leh, an permit-te tihnun (renew) a nih tawh dawn loh avangin Mizorama bonded warehouse leh zu dawr zawng zawngte chu khâr a ni tih an puang.

END chuan, "MLPC Act hnuaia Mizoram sorkarin wineshop permit a pek chhuahte chuan May 27, 2019 thleng High Court-in hun pek belh mah se, an neih sa an hralh zawh tâk avang leh an permit-te renew a nih tawh dawn loh avangin tun kar hian khâr a ni ta. Bonded warehouse pathumte pawh an zu neih sate an tihral tawh avangin sorkara an security deposit la chhuakin khâr an ni tawh bawk. Tunah hian phalna neia zu zawrh, lei leh in theih a ni ta lo," an ti.