National Technology Day hman a ni

Directorate of Science & Technology bultumin nimin khan Vanapa Hall-ah National Technology Day hman a ni a, chief secretary Lalnunmawia Chuaungo-in a hmanpui. National Technology Day hi May 11 a ni a, sorkar chawlh a nih avangin nimin khan hman a ni.

Lalnunmawia chuan, Science & Technology hnuaia hmalakna hrang hrangte chhuanawm a tih thu sawiin, "Hmasawn nan sum leh pai a pawimawh rualin, a resource tak tak zawk, mihringte kan pawimawh hle. Kan pi leh pute'n technology an lo hmang ṭangkai tawh ṭhin a, mei chhêm alh nan chhèmthei hman nacháng an lo hre daih tawh. Keini pawhin kan ni tin nuna hna kan thawhna kawngah technology hi ṭangkai takin kan hmang thei a ni," a ti.

Chief Secretary chuan, science zirlaite chu Mizoram tana mi ṭangkai leh chhenfâkawm tak nih tum turin a fuih a, an tui zawngte hai chhuak thiam tur leh an kal duhna zawngte chu an chhungte nen pawh a sawiho ṭhin turin a chah.

Inkhawm kaihruaitu Dr C Vanlalramsanga, Planning secretary chuan, mihring nuna technology pawimawhzia a sawi a, "Tunlaia hmasawnna zawng zawng deuh thaw hi technology revolution-in a hrin chhuah a ni. Technology hi a chhe zawng leh a ṭha zawnga hman theih tak a nih avangin kan hman danah fimkhur hle a pawimawh," a ti.

Directorate of Science & Technology-a chief scientific officer Dr RK Lallianthanga'n MISTIC, MIRSAC leh Mizoram Science Centre hmalakna hrang hrangte a tarlang. National Technology Day hi kum 1998-a India-in ama kutchhuak technology khawvel hriata a pho chhuah ní a ni a, India ram chu nuclear siam thei ram a nihzia lantir nan Rajasthan-a Pokran-ah nuclear hlawhtling takin a enchhin a ni. Trisul missile pawh hlawhtling tak en­chhinin, thlawhtheihna Hansa-3 an vuah chu he mi ni hian hlawtling taka thlawhtir a ni bawk. 

Kum 1999 aṭangin National Technology Day  hi kum tin ram hmasawnna atana technology pawimawhna inhrilhhriatna leh inzirtirna hun atan hman ṭhin a ni.