Kawngpui tihthâwl dan tur sawiho
Nimin khan PWD chief engineer (Highways) Lalmuankima Henry hoin PWD CE Conference Hall-ah Sihhmui-Sairang leh Bawngkawn inkar NH-54 kawngpui leh Bawngkawn leh Tuirial inkar NH-54 kawngpui dungte tihthâwl dan tur an sawiho.
Meeting-ah Aizawl DC, Aizawl Municipal Corporation Secretary, Traffic SP, Central YMA President te, khua/veng ṭhenkhat - Bawngkawn, Chaltlang, Chanmari West, Edenthar Veng, Hunthar Veng, Rangvamual, Phunchawng, Sairang, Ṭhuampui leh Zemabawk North local council leh village council aiawhte leh PWD official-te an tel.
Lalmuankuma Henry chuan, Sihhmui-Sairang leh Bawngkawn inkar kawngpui chu Aizawl khawpui panna kawngpui lûn ber a nih thu sawiin, "Khualzinte'n Mizo hmélhmang an hmuh hmasakna a ni a, sorkar hotute aṭang pawhin ngaihtuah hmanhmawh tura hriattirna a awm tawh," a ti.
Local council-te'n Tuirial-Bawngkawn-Sairang NH-54 kawngpui tâwt chhan nia an sawi tlangpuite chu - kawngpui chhehvela workshop tam lutuk te, kawngpui titâwt zawnga lirthei inhûng te, lirthei hûn phal lohna hmuna motor lian ding te, kawngpui dunga motor silna te, sumdawng leh mimal hmalakna vanga tuihâwk luankawr inhnawhkhat leh kawngpui nêk chêp zawnga hmalakna dangte a ni.
Meeting chuan, kawngpui dung a thâwl zawk theih nan mipui thlawpna an ngen a; a rang lama hna thawk turin Aizawl Bawrhsap kaihhruaina hnuaiah committee leh task force din a nih theih nan rawtna Chief Secretary hnenah thehluh an rawt.