Naupangte lung enfiahsak

National Health Mission (NHM) hnuaia Rashtriya Bal Swasthya Karyakram (RBSK) leh Manipal Hospitals, Bangalore-te chuan nimin khan District Early Intervention Centre (DEIC), Kulikawnah 'Screening Camp for Congenital Heart Disease' (pian tirh aṭanga lung natna nei endikna) an buatsaih.

Screening camp hawnna inkhawm chu NHM mission director Dr Eric Zomawia'n a kaihruai a, Hospital & Medical Education director Dr T Lalhmangaihi khuallian a ni. Khuallian leh Manipal Hospital consultant Dr Lalchand H Bandagi ten thu an sawi. Screening-ah hian naupang 135 endik an ni a, chu'ng zinga 50 chuangin lung ná an nei tih hmuh chhuah a ni.

RBSK hi Mizoramah July 2013 aṭangin kalpui a ni a, nausen piang hlim aṭanga tleirawl kum 18 inkarte hriselna endiksakna programme a ni. Natna 30 a huam a, chu'ng zinga natna 13-te chu enkawlna tur senso RBSK-in an tumsak vek thei. 

Mizorama RBSK kalpuinaah hian August 28, 2018 khan Manipal Hospital, Bangalore nen thawhhona thuthlung ziah a ni a, thuthlung hnuaiah Manipal Hospital-ah naupang lung na nei 42 hlawhtling taka zai an ni tawh.