MLA Ngunlianchunga kutthlak tumah MPCC-in MoS TJ Lalnuntluanga puh
Mizoram Pradesh Congress Committee (MPCC) chuan, March 15, Thawhṭannia Mizoram Legislative Assembly budget session-ah House chhunga inhnialna chu páwn lamah chhunzawmin, minister of state (MoS) TJ Lalnuntluanga'n INC member C Ngunlianchunga kutthlak a tum tih an tarlang.
MPCC hruaitute chuan nimin khan Aizawl Press Club-ah thuthar thehdarhtute an kâwm a; an spokesperson Dr Lallianchhunga chuan March 15, 2021-a Assembly session-ah thil thleng ngai lo pawi tak a thleng chu an dem thu a sawi. TJ Lalnuntluanga chu ngaihdam dil tura phûtin, ngaihdam a dil lo a nih chuan Congress party-in an MLA thlavâng hauhin ṭul an tih dan angin hma an la dawn tih a puang.
Assembly House-ah Lawngtlai West bialtu MLA Ngunlianchunga'n thu a sawi laiin Parliamentary Affairs minister TJ Lalnuntluanga'n senior zawk zah derna nei loin, govt. chief whip a nihna hmachhuanin ṭawngkam mawi lo tak takin a bei nia sawiin Dr Lallianchhunga chuan, "Thil zahthlak tak Assembly House-a a thleng hi hriatthiam harsa kan ti hle a, Mizoram Legislative Assembly zahawm tak tihbawrhbànna-ah kan ngai," an ti.
MPCC tarlan danin, TJ Lalnuntluanga thusawi, June 2, 2020-a chanchinbu hrang hranga chhuak tawh, 'Tun dinhmunah Covid-19 laka kan him theihna chhan hi kan Chief Minister-in Pathian a ṭih vang niin ka hria,' a tih chu Ngunlianchunga’n House-ah a sawi chhuak a ni. Chu chu TJ Lalnuntluanga chuan voice record dilin, mawi lo takin a bei a; House páwn thlenga ûm zuiin, ṭawngkam mawi lo tak taka beiin, kutthlak a tum a ni.
TJ Lalnuntluanga chu ram rorelna kháwla hnuhma ṭha lo tak tichhuaktua an ngaih thu sawiin MPCC chuan, "Pu TJ Lalnuntluanga hian vawiin March 16, 2021 ral hma ngeia Pu Ngunlianchunga hnenah mimal taka ngaihdam a dil bakah, mipui hriat turin ngaihdam dilna statement a siam ngei tur a ni. Ngaihdam a dil duh lo a nih chuan kan MLA thlavâng hauhin a ṭul dan angin hma kan la ve dawn a ni," an ti.
Congress party tarlan danin, MNF party-in an Media & Publicity secretary R Lalhmangaiha hmingin June 1, 2020 (Thawhṭanni)-a press release (Memo No. MNF/Media/01/2020/46) an siamah TJ Lalnuntluanga thusawi an tarlang a, 'Tun dinhmunah COVID-19 laka kan him theihna chhan hi kan Chief Minister-in Pathian a ṭih vang niin ka hria,' tia a sawi thu tarlan a ni.
June 1, 2020-a MNF press release chu TV leh chanchinbu hrang hrangah tarlan a ni tih sawiin MPCC chuan, "Pu TJ Lalnuntluanga'n a thusawi chiang taka anmahni party PR ngeia lang leh chanchinbua chhuak vek tawh phat a tum leh pawh hi House leh member zahawm tak tak te, an party media mite leh chanchinbumite zah lohna dik tak a ni," an ti.