FSSAI hotute'n CM an kâwm

Ministry of Health & Family Wefare hnuaia Food Safety and Standards Authority of India (FSSAI) chairperson Rita Teaotia leh CEO Arun Singhal te chuan nimin zing khan chief minister Zoramthanga a pisaah an hmu a; Mizoram mipuiin ei tur thianghlim leh hrisel zawk an neih theih dan tur an sawi.

Chief Minister chuan, mipuiin ei tur thianghlim an neih leh zûk leh hmuam do a ngaih pawimawh thu sawiin, "FSSAI nen innghêng hnai zawka kan thawh dun a, state mipui hriselna atana theihtawp min chhuahpui a pawimawh," a ti a; Mizorama ei tur thar leh siamte bakah, state páwn aṭanga lak luhte chu uluk zawka enfiah a ṭul thu a sawi bawk.

FSSAI hotute chuan, Mizo­ramah chak zawka hna an thawh theihna tura hmalak ngaite Chief Minister hnenah an thlen a; ei leh in thianghlim mai bakah, ei tur dik, taksa hriselna mipuiin an ei a, natna laka him tlàn theihna tura Eat Right India Initiative an kalpui mek chungchangte an sawipui a ni.

FSSAI hotute hian nimin vêk khan Health minister Dr R Lalthangliana an kâwm a;  Mizorama Food Safety tihhmasawnna tur leh Food Testing Laboratory changtlung zawk neih a nih theih dan turte an sawipui a ni.