Lunglei Municipal Council din tum; Bawlhhlawh thliar hran A ni zel dawn - Deputy CM
Nimina Assembly session-ah AMC nodal department UDPA changtu deputy chief minister Tawnluia chuan, Lunglei Municipal Council siam turin department-in ruahmanna (proposal) an siam vek tawh thu a sawi. Bawlhhlawh thliar hran chungchangah Tawnluia chuan, "Dan ang takin kenkawh zel tur a ni," a ti.
ZPM member C Lalsawivunga zawhna chhangin Dy. CM chuan, Lunglei Municipal Council atan department-in proposal a siam tawh thu sawiin, "Cabinet memorandum buatsaih a ni tawh a, in principle chuan tlang tura ngaih a ni. Ward tih dan tur pawh buatsaih a ni tawh. Nikumah Covid-19 avangin hma kan la thei lo. Kum 2021-22 chhunga tihpuitlin theih tura ruahman ni se kan ti a, hmachhawpah kan nei," a ti.
Tawnluia chuan, The Mizoram Municipalities Act, 2007-in a tarlan danin, municipality khawih tur subject 18 dah a nih thu ZPM member Vanlalhlana zawhna chhangin a sawi a, "AMC hian sorkarin subject a pekte hi an capacity mil zelin a tahtawlin a khawih chho. Road & bridges, water supply for domestic leh fire services tih loh chu pek an ni tawh," an ti a, an tlin tâwk ang zelin subject zawng zawng pawh pek tura ruahman a nih tur thu a sawi.
AMC-ah subject pek belh an châk tih sawiin Dy. CM chuan, "Subject pek belh turin AMC tihchak ve zel a ngai. Nikumah post 98 siam thar a ni a, a thawk lai 50 zet kuminah regularised a ni. An subject bakah urban street design duan zawh a ni tawh a, Cabinet-in a pawm chuan AMC thawh tura tih a ni. Industrial Growth Centre, Luangmualah AMC-in ram a nei a, tah hian AMC enkawl turin Music City din kan tum. A dinna atan Smart City-ah cheng vbc. 12 dah a ni," a ti.
ZPM member Dr Vanlalthlana zawhna chhangin Tawnluia chuan, bawlhhlawh ṭawih thei, ṭawih thei lo leh plastic-te thliar hran zel tur a nih thu sawiin, "Dan ang takin kenkawh zel tur a ni. Mipui pawh kan zirtir zel ang a, thil ṭha na nâ nâ chu mipui pawhin an ngaithiam sâwt hle a ni," a ti a; MLA-te chu an veng leh tih theih chinah dan zawm chu an tih tur a ni tih mipui zirtir zel turin a ngen.
Deputy CM chuan, Solid Waste Management Centre chu SIPMIU-in AMC kutah a hlan tawh thu sawiin, "Technical lam zir tur tam tak a awm. Tun dinhmunah chuan SIPMIU leh AMC-in a inṭâwmin an kengkawh mek a ni," a ti.