P&E-in cheng vbc.77.7 chuang an bá

Nimin Assembly session-ah Power & Electricity minister R Lalzirliana chuan, an department-in supplier leh contractor bill cheng vbc. 77.7 chuang an bat mek thu House a hrilh.

MNF member L Thangmawia zawhna kal zelah R Lalzirliana chuan leiba an ngah tih sawiin, "Contractor bill vbc. 39.8 chuang leh supplier bill vbc. 37.92 chuang kan bá. Leibá hi tun hnaia mi chauh a ni lo, sorkar kal ta aṭanga inhlan chhàwn zel a ni," a ti.

P&E Minister tarlan danin, Mizoramah hydel project siam zawh tawh 20 a awm a, chu'ng zinga paruk - Tuila MHP, Lau MHP, Tuisumpui MHP, Tuidum MHP, Laililui MHP, Vawralui MHP, Ramrilui MHP leh Leiva MHP-te chu hmantlak a ni tawh lo.

Mizoram hmun pali-ah solar power plant siam zawh a ni tawh a; chu'ngte chu - Tlungvelah megawatt 2 pe chhuak thei, Melriat, Sihhmui leh Khawivaah kilowatt 100 ṭheuh pe chhuak theite a awm a ni.