KHAWTHLIR

Mizoram UPC-a ṭhalai pawl, PYD, Kolasib bial chuan PYD Day pualin nimin khan Kolasib District Hospital tan thisen unit 41 an pe a, petute mipa 33 leh hmeichhia pariat an ni. Mizoram PYD, Kolasib bialte hian PYD Day pualin kumin March thla chhungin thisen pek ṭum thum an huaihawt a, mipa 62 leh hmeichhia 13-te'n thisen unit 75 an pe a ni. 

Election Commission of India (ECI) chuan Mizoram chief electoral officer (CEO) atan P Jawahar, IAS (AGMUT, 2007) a ruat a, Ashish Kundra a thlâk ang. Hemi chungchangah hian March 15, 2021 khan ECI-in notification a tichhuak a ni.

Aizawl DEO chuan thuchhuah siamin Special Revision of Photo Electoral Rolls, 2021 hnu lama kum tling tharte tan mobile phone-ah e-EPIC download thei a nih thu a tarlang.

PAHOSS hnuaia in sak ṭanpuina dil chungchang March 15, Thawhṭannia Vanglaini-a tarlanah, Zemabawk Presbyterian Kohhran tih chu tihsual palh a ni a, Zemabawk North Presbyterian Kohhran tih zawk tur a ni. Zemabawk Kohhran hruaitute pawhin, PAHOSS hnuaiah ṭanpuina an dawn loh thu an sawi.

March 15, Thawhṭanni zan dar 7 vel khan Ruantlang, Champhaia Mizoram Rural Bank chu a kâng a, in leh bungrua kâng ral loin ṭhelh mih a ni. Thu dawn danin, Champhai Ruantlang MRB manager computer leh bungraw dang ṭhenkhat a kâng chhia a, pawisa erawh a kâng lo thung.

Assam Rifles 23rd Sector DIG Brig. Digvijay Singh chuan nimin khan Lammualah 46th Assam Rifle leh National Jute Board buatsaih Jute Fair Aizawl a hawng. Jute Fair-ah hian dawr 24 hawn a ni a, buara hrui (jute) aṭanga siam thil hrang hrang zawrh niin, March 21, 2021 thleng a awh ang.

Commerce & In­dustries minister Dr R Lalthangliana chuan nimin khan Dawrpui multipurpose centre-ah Micro Small & Medium Enterprises (MSME) Town Hall Meeting a hmanpui. He hun hi RBI, Aizawl Branch leh Young Indians - Mizoram Chapter buatsaih a ni.

Khawzawla Mizo­ram State Rural Livelihood Mission leh Krishi Vigyan Kendra (KVK)-te chuan nimin khan KVK, Khawzawl pisa tualah training an buatsaih a, additional DC Lalrohlua'n a hmanpui. Khawzawl RD Block chhunga khaw 15-a leilet neitu mi 115 hnenah leilet buh chi ṭha Pusha Sugandh (PS)-5 kg. hnih ṭheuh an sem nghal a ni.

Mizoram Un­iversity-a Department of Social Works leh Mizoram Professional Social Worker’s Association (MPSWA) chuan nimin khan MZU-ah World Social Works Day an hmang a; MZU Social Works department-a HoD Prof. Kangaraj-in thupui, 'I am because we are' tih a sawi.