COVID-19: Mizoram dinhmun Hripui vei mi 2 hmuh belh a ni

March 15, Thawhṭanni khan Mizoramah Covid-19 vei mi pahnih hmuh chhuah a ni a, nimin khan hripui laka fihlim tawh chhuahtir an awm lo.

Covid-19 vei hmuh tharte chu RAT hmangin Aizawla endik zinga mi an ni a, Zonuam venga nupa, mipa kum 60 leh hmeichhia kum 56 an ni. An pahnih hian Covid-19 natna (symptom) an neih avanga damdawi-in an pannaa hmuh chhuah an ni a, hri an kàina hriat a ni lo.

Mizoramah Covid-19 vei mi 4,439 hmuh chhuah a ni tawh a, mipa 3,237 leh hmeichhia 1,202 an ni. Nimin tlai dar 5 thleng khan mi 4,417 (99.50%) chhuahtir an ni tawh a, mi 10 (0.23%) thi tawhin, enkawl mek mi 12 (0.27%) an awm. 

Mizoramah March 15, Thawhṭanni khan ZMC laboratory-ah swab sample 12, TrueNAT-PCR hmangin Champhai leh Mamitah sample pakhat ve ve leh RAT hmangin district pakuaah sample 521 endik a ni a; endik zawng zawng chu 535 niin, chu'ng aṭanga Covid-19 positive hmuh chhuah pahnih chu 0.37% a ni.

March 15, 2021 thlenga Mizorama swab sample endik tawh zat chu 2,43,076 a ni a, chu'ng aṭanga Covid-19 positive hmuh tawh zat 4,439 chu 1.83% a ni. Hripui vei hmuh tawh zinga mi 2,121 chu Mizoram chhunga kái chhâwng an ni a, mi 2,318 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,657 hmuh chhuah a ni tawh a, TrueNAT-PCR hmangin 674 leh RAT hmangin 1,107 hmuh chhuah a ni tawh.