Mau hmanga sum siam tumah sorkar puh

ZPM Ṭhalai chuan nimin khan ZPM pisaah thuthar thehdarhtute an kâwm a; MNF sorkar chu kut hnathawktute ngaihsak si loa mau hmanga sum siam tumah an puh.

ZPM Ṭhalai general secretary J Lalramnghaka chuan, March 13, 2021 khan Hmunpui rama Arlei zau, Mamit district-a Mizoram sorkarin mau a chìntirna hmun an tlawh tih sawiin, "MNF flagship programme mau chìn kalpui dan hi a bilh a tho lo. Kut hnathawktute tan chuan 'economic kawihsapir' ni loin 'economic mangkháwng' a ni zawkah kan ngai," a ti.

J Lalramnghaka chuan, sorkarin mau a chìntirte chu a la enpui loh thu sawiin, "Hmunpui khuaa chhungkaw 96 leh Aizawl aṭangin chhungkaw paliin Hmunpui ramah mau an chíng a, sorkar official-te'n an la enpui lo. Whatsapp group chu an siampui ve a, mau chíngtute an bangbo hle a ni," a ti a; sorkar flagship programme chu Whatsapp group hmanga vil mai chi a nih loh thu leh, mau chi phun thi tawhte thlakna tur pek an la ni lo chu pawi an tih thu a sawi.

Mau chìn nan mau hmun vah a nih thu sawiin Lalramnghaka chuan, "Hei hi National Bamboo Mission thil tum (objective) paruk zinga pakhat bawhchhiatna a ni," a ti a; mau chìnna hmun panna kawng chu lirthei luh theih lohna a nih thu sawiin, "Kein darkar khat vel kal a ngai a, CM Pu Zoramthanga'n a sawi anga mau lian phurh chhuah nan chuan kawng a têin a chhengchhe khawp mai," a ti.

Bamboo link road siam pawh hautak tak tur a nih thu sawiin ZPM Ṭhalai GS chuan, "Khua aṭanga hla tak, a panna kawng chhengchhe taka bamboo link road siam tum hi tute emaw sum insiam tumna em ni, tih hi kan zawhna a ni," a ti bawk.

ZPM Ṭhalai hruaitute chuan, National Bamboo Mission aṭanga State Bamboo Mission kalpuina atana sum dawn leh SEDP aṭanga cheng vaibelchhe tam tak sèn ralna chu an vil zui reng dawn thu an sawi a ni.