Myanmar-a Mizote ngaihven turin MP-in External Minister a ngen

Lok Sabha MP C Lalrosanga chuan nimin khan Parliament House-ah External Affairs minister S Subrahmanyam Jaishankar a hmu a; India leh Myanmar rama Zo fate himna leh enkawlna kawngah hma la turin a ngen.

C Lalrosanga chuan, tun hmaa Myanmar aṭanga ráltlânte United Nations thlazar hnuaia kum 25 dáwn India rama an awm theih avangin lawmawm a tih thu sawiin, "India-a cheng Chin unaute tan a hlu hle a ni," a ti a; tunlaia Myanmar-a buaina chhuak mek avanga Mizorama ráltlânte leh Myanmar rama Zo hnahthlak awmte himna ngaihtuahsak a, hma la turin External Affairs Minister a ngen a ni.

S Jaishankar chuan, Myanmar-a buaina chhuak mek leh a nghawngte Mizoram MP-in a ngaihmawh chu a ṭâwmpui thu sawiin, "Thiam taka hmalak a ṭul a ni," a ti a; a ṭul anga hmalak a tum thu a sawi.