RS MP Vena'n Myanmar ráltlânte chungchang Parliament-ah a sawi

Mizoram Rajya Sabha MP K Vanlalvena chuan nimin khan Parliament session-a zero hour-ah thu sawiin, Myanmar ram buaina avanga Mizorama ráltlânte chungchang a sawi chhuak a; Myanmar ráltlânte himna turin a ṭul anga an kalphung her danglam turin Ministry of Home Affairs (MHA) a ngen.

K Vanlalvena chuan, Myanmar ramah democracy tungding a, mihring dikna leh chanvo humhim tura beitute chungah sipaite rawng taka an chêt avangin sahimna zawnga Mizorama tlan lut mi 300 chuang an awm tawh thu a sawi a, "Mi 300 zinga mi 150 zet chu Myanmar police an ni. Heng mite hi Mizoram sorkar leh Mizo mipui, pawl hrang hrangte'n lo kuangkuahin, sorkar laipui hriatpui lohin an lo ṭanpui a ni," a ti.

Chutih laiin, MHA chuan tun hnaiah Myanmar ramri depa awm hmarchhak state palia chief secretary-te lehkha thawnin, Myanmar aṭanga tlanchhiate dawngsawng lo tura a hriattir bakah, Assam Rifles-te chu Myanmar aṭanga ramri kãna India rama lut turte dang tura a hriattir thu a sawi.

K Vanlalvena chuan, Myanmar aṭanga tlanchhiate lo dang kîr tura MHA-in a ti chu Mizo mipuite'n an hrethiam dawn lo tih sawiin, "Myanmar aṭanga rawn tlanchhiate hi Mizote hnampui, Mizo chi leh kuangte an ni a, tihhlum tura an rama thawn kìr chu mihring nihna aṭanga ngaihtuah pawhin thil tih chi a ni lo. Myanmar buaina a ziaawm a, a rálmuan hma loh chuan inthawn kìr chi a ni rih lo," a ti.

Rajya Sabha MP chuan, India ram chu khawvela democracy ram lian ber a nih angin, mipui rorelna democracy tungding tura beihna reng reng thláwpa ṭanpui tura a ngaih thu a sawi a; khawvelin Myanmar ráltlânte chu hum turin India an beisei tih sawiin, Myanmar ráltlânte chungchanga MHA thu thlak danglam turin MHA leh Parliament a ngen a ni.