DC leh AMC hotute'n SWMC an tlawh

Nimin khan Aizawl DC Dr Lalhriatzuali Ralte leh AMC hotute'n executive councillor (i/c Solid Waste Management) Laltlanzova Khiangte hoin Solid Waste Managment Centre (SWMC), Tuirial an tlawh a, hmalak zel dan tur an enfiah.

Dr Lalhriatzuali chuan, Aizawl DC mawhphurhna a chelh hnuah AMC leh UDPA department-te nen thawhho dan tur a ngaihtuah thu a sawi a, "A bul ṭanna atan SWMC hi kan district chhunga awm a nih angin ka tlawh a ni a, a dinhmun, harsatna awmte a hmun ngeia hmuh ve ṭha ka ti a ni," a ti.

Aizawl DC hian amah ṭawiawm turin Nazuk Kumar, IAS a sáwm a, a sàwm chhan chu, Indian Institute of Technology chhuak a nih avangin a thiamnate hman ṭangkai dan a awm a beisei vang a nih thu a sawi.

AMC EC Laltlanzova Khiangte chuan, SWMC chu state-a Congress sorkar hun laia buaipui a nih thu sawiin, "SIPMIU-te chu a hmunhma buatsaih tura tih an ni a, kum hnih bak enkawl zui tura tih an ni lo. AMC-a sorkar an awm loh lai, inthlan hma khan AMC enkawl tura tih a ni a, Mayor hoa kan meeting-naah huphurhawm hle mah se, phurrit zawng ni lo, chona zawnga ngai turin thutlukna siam a ni," a ti.

SWMC  chu AMC kutah lut mah se, state sorkarin a enkawlpui zel dawn tih sawiin Laltlanzova chuan, "A thuphungin SWMC hi AMC-in a lâk remtih ni tawh mah se, inhlan chhawna enkawl zui dan tur tak tak kan la sawiho lo," a ti a; Assembly session zawhah UDPA Minister hoin an la sawiho dawn tih a sawi.

Laltlanzova Khiangte sawi danin, SWMC chu enkawl duh firm/company an awm chuan, an hnena pek (outsource) AMC-in a duh a ni.