ZPM kan chak ngei a rinawm - MLA Chhuanthanga

Aizawl South-II bialtu MLA Lalchhuanthanga chuan, ZPM party-in hma an sâwn nasa nia sawiin, Serchhip biala Assembly by-election-ah pawh an candidate a tlin ngei an rin thu a sawi.

March 15, Thawhṭannia BS Farm-a Aizawl South-II ZPM Block inthlannaah thu sawiin Lalchhuanthanga chuan, "ZPM hian a din tirhte ngaihtuah chuan hma a sawn nasa hle. Eng lai pawh hian zawmtu leh belhtu hi a nei chho ta char char a ni," a ti a; AMC inthlan an hmachhawn hmasa berah ward paruka an chak chu ZPM hmasawnzia tichiangtu niin a sawi.

Lalchhuanthanga chuan, kum 2023 inthlanpuiah sorkar tura beiseiawm ber chu ZPM an nih thu sawiin, "Serchhip bialah by-election a awm dawn a, mi hrang hrangte Serchhip bial inthlan ṭhat tur chungchang zawt ila, ZPM an chak an rin thu an sawi zel. He inthlan lo awm turah hian ZPM hian chakna a chan ngei a rinawm a ni," a ti.

He hunah hian AMC Ward-XVIII councillor Malsawmzuala Ralte leh Ward-XIX councillor Baryl Vanneihsangi te pawhin thu an sawi a ni.