Cheng nuai 473 man hu ruihhlo MKHC Chairman-in a hal ral
Central YMA hnuaia ruihhlo dotu, SRS Batch 8-nain ruihhlo an man khawm, cheng nuai 473 chuang hu chu Inrinni zing khan Mizoram Kohhran Hruaitute Committee (MKHC) chairman, Rev. R. Lalhmingthanga'n CYMA pisa kawtah a hal ral.
Rev. R. Lalhmingthanga chuan, tun hma deuh kha chuan YMA chu thlan laih leh ṭanpui ngaite ṭanpui ṭhintu tia hriat an ni tih sawiin, "Tunah erawh tun hmaa la hriat ngai loh sualna chi hrang hrang doa an hmanhlelh a ngai ta hian ngaihtuah a ti thui hle. Hetih rual hian khawtlang nun siamṭhat kawnga YMA hmalakna chu thil ropui tak a ni a, ram leh khawtlang tana an thawhrimnaah MKHC Chairman leh Synod Moderator ka nih angin lawmthu ka sawi a ni," a ti.
Rev. R. Lalhmingthanga chuan, tun hma deuh kha chuan YMA chu thlan laih leh ṭanpui ngaite ṭanpui ṭhintu tia hriat an ni tih sawiin, "Tunah erawh tun hmaa la hriat ngai loh sualna chi hrang hrang doa an hmanhlelh a ngai ta hian ngaihtuah a ti thui hle. Hetih rual hian khawtlang nun siamṭhat kawnga YMA hmalakna chu thil ropui tak a ni a, ram leh khawtlang tana an thawhrimnaah MKHC Chairman leh Synod Moderator ka nih angin lawmthu ka sawi a ni," a ti.
Rev. R Lalhmingthanga chuan, ruihhlo do hi YMA-in thawk lo se chu tuna Mizoram dinhmun tur chu ngaihtuah ngam loh khawpa chhia a ni thei tih sawiin, nasa zawka ṭan la zel turin a chah.
CYMA president Vanlalruata chuan ruihhlo do leh sualna chi hrang hrang vengtu tur ni lo YMA-in vawiin thlenga he hna thawh a la ngai chu pawi a tih thu a sawi a, "Ruihhlo an do avang hian YMA chuan sawiselna tam tak a lo tawh phah tawh ṭhin a, hetiang hi ni mah se, tha kan thlah a nih vaih chuan Mizoram dinhmun tur chu a chhiat nasat dawn bawk si avangin tlawmngaih kan la chhuah hram hram a ni," a ti.
Tun hnaiah ruihhlo ti leh ruihhlo vanga thihna a hluar leh tawh tih sawiin CYMA President chuan, "Hetih rual hian nau piang an tlem telh telh bawk si avangin ngaihtuahna hman fimkhur a ngai hle. Ram leh hnam siamṭhat kawngah sorkar, kohhran leh YMA rualkhai taka an thawh ho a ngai," a ti a, ram leh hnam siam ṭhat hna thawktu chu ban pakhat chauh a nih chuan a tliah hun a awm palh thei tih a sawi.
SRS Batch 8-na convener, CYMA asst. secretary Peter Chhakchhuak tarlan danin, tun ṭuma ruihhlo an hal ralte hi geroin hawng 188, can 1,436, chhinsen leh Bhaga cap 963, alprozelum mum 13,997, Ganja kg. 2 leh pocket 422, khuh damdawi bottle 130, methamphetamine mum 1,02,424, morphine ample 985, sapzu um 82, rakzu fun 246, cyclopum mum 370 leh pawisa lem Rs. 6,47,500 a ni.