Model Code hlih veleh zu khap dawn MLP Rules peih vat tum a ni - Beichhua

Excise & Narcotics minister Dr K Beichhua chuan, Election Model Code of Conduct (MCC) a zawh veleh zu khapna dan, Mizoram Liquor Prohibition Act, 2019 (MLP Act) hman ṭan a nih tur thu a sawi. MLP Act a taka kalpui turin MLP Rules tur buatsaih mek a ni.

Vanglaini palai zawhna chhangin Dr K Beichhua chuan, "MCC hman a la nih avangin MLP Act hmanna atan hian notification tihchhuah a la ni lo. MCC zawh veleh notification tichhuakin, MLP Act hman zui nghal a ni ang," a ti. Lok Sabha inthlanpui vanga MCC puan chu May 27, 2019-ah a tawp dawn.

MLP Rules peih a la ni lo tih sawiin Excise Minister chuan, "Rules hi peih la ni lo mah se, MLP Act hmang tura notification tihchhuah a nih tawh chuan dan hi hman theih tho a ni. Rules pawh rang taka peih a ni ang a, a rang lamin House-a pharh a ni ang," a ti.
Dr K Beichhua chuan, zu khap a nih dawn avangin Excise & Narcotics department thuam chak zel a nih dawn thu sawiin, "Hman ni lawkah training chhuak 52 an awm. Mi 66 lak belh sorkarah dil leh a ni a, 33 lak min remtihsak tawh. Mahse, MCC puan a la nih avangin mi thar lak theih a la ni rih lo," a ti a; sum dinhmun azirin thawktu lak belh zel a nih tur thu a sawi.

Excise & Narcotics Minister chuan, zu khap hlawhtling turin ṭan rual a pawimawh tih sawiin, "NGO, kohhran leh mipuite nena thawhhona ṭha tak kan neih loh chuan hlawhtlin a harsa dawn a ni," a ti. Sorkar ringawtin zu a do hneh dawn lo tih sawiin K Beichhua chuan, "Zu khap hi kan ram tana ṭha tur a nih angin ṭanho a pawimawh hle. Sorkar ringawt a mal ṭan chuan a hlawhtlinna a awm thei lo," a ti a; MLP Act hman a nih huna thawhpuiah NGO, kohhran leh mipuite a sáwm a ni.