LADC VC inthlanah MNF an chak

May 8, 2019 a Lai Autonomous District Council (LADC) huam chhunga Village Council (V/C) 95 inthlana vote tlate chu chhiar zawh a ni tawh a, MNF-in khaw 62 ah hnehna an chang.

LADC hnuaia VC 95-ah hian hmeichhe tana hauh bik (reserved) seat 95 awmin, general seat 374 nen a zavaiin seat 469 a awm. Inthlan chuhtu BJP aṭangin mi 16, INC aṭangin mi 422, MNF aṭangin mi 460 leh independent candidate mi 259 awmin, candidate zawng zawng hi mi 1157 an ni.

LADC VC inthlanah hian MNF-in seat 301 lain, khaw 62-ah hnehna an chang a; INC chuan seat 119 lain, khaw 12-ah hnehna an chang. Independent candidate-te'n seat 45 lain, khaw 4-ah hnehna an chang a; inhneh tawkna khua 13 awmin; INC, MNF leh independent-in seat khat ṭheuh an lakna khua pali a awm.

Inthlanpui neih zawh takna he'ng village council 95-a member thlan tlinte hian May14, 2019 hma ngeiin executive body an siam fel a ngai a ni.