Mi 5581-te Finger print FSL-in chhinchhiah tawh

Mizoram Forensic Science Laboratory (FSL) hotute chuan, misual chhui chhuahna atan finger print hman ṭangkai a nih thu an sawi a, pawi khawih ṭhin mi 5,581-te finger print chhinchhiah a ni tawh.

Vanglaini palai zawhna chhangin FSL director H Sangchungnunga chuan, pawi khawihna a thlenin police-te nen pawi khawihna hnûhmá (crime scene) an enfiah ṭhin thu a sawi a, "Kan thil hmuh chhuahte chu police hnenah kan hlan nghal ṭhin. Finger print kan lakte hi a ṭangkai hle a, hemi hmang hian pawi khawihtu eng emaw zat man chhuah an ni tawh," a ti a, finger print lakna hmanraw changkang zawk lei belh an tum mek thu a sawi.

H Sangchungnunga sawi danin, hmun ṭhen­khatah chuan tih luih ni loa crime scene tihchingpen a awm ṭhin a, mahse, crime scene vawnhim kawngah mipui an harh thar zel a ni. FSL Director chuan, crime scene zir chiang a, a ṭul angte finfiah tur district dangah an awm loh thu sawiin, "Kohna kan dawn chuan FSL Directorate aṭangin kan kal mai ṭhin. Office hnathawh laklawh laite'n hmun danga zin chhuah a ngaih cháng a awm ṭhin a ni," a ti.