Kum 2018-19 chhungin sorkar hnathawkte MR bill-ah Rs. 55,27,22,166 sên a ni
Mizorama sorkar liam tain sorkar hnathawk damlo inenkawlna senso titlêm tura Central Government Health Scheme (CGHS) rate anga medical re-imbursement (MR) bill an enfiaha an pêk hnuah sorkar kum 2018-19 chhung khan sorkarin a hnathawkte MR bill-ah Rs. 55,27,22,166 (cheng vbc. 55.27) a sêng.
CGHS rate anga MR bill kalpui hma, kum 2017-18 khan Mizoram sorkar chuan MR bill atan budget-ah cheng vbc. 98.51 a dah a, chuta ṭanga chhût chuan, kum 2018-19 chhunga MR bill-ah hian sorkarin cheng vbc. 43.24 a hlêpah ngaih a ni. Mizoram State Health Care Society (MSHCS) hotuten Vanglaini an hrilh danin, kum dangah chuan MR bill 30,000 chuang a lut ṭhin a, CGHS rate anga an kalpui hnuah chuan bill 15,381 chiah a lut. Sorkar hnathawk MR bill dan thar hi MSHCS chuan an khawih a, CGHS rate anga kalpui a, uluk taka bill enfiah a nih avangin sum sen a tlêm phah thu MSHCS hotute chuan an sawi.
MSHCS chhinchhiah danin, April 2018 - March 2019 chhung khan Mizoram chhung leh phai lama inenkawl damlo mi 9,988 an awm a, chu'ng damlote chuan an inentirna aṭangin bill 15,381 an siam a, bill-a sum dil zat chu Rs. 68,62,04,469 a ni. Bill thehluttu mi 9,988 aṭangin mi 9,905-te bill 15,214 pawm a ni a, bill 167 hnâwl a ni.
Sorkar hnathawk MR bill-a langsar zual
# Sorkar hnathawkte bill 5,293 a nih laiin, an chhungte bill 8,372 a awm.
# State páwnah sorkar hnathawk bill 764 a awm laiin, an chhungte 952 a awm.
# Kum khat chhunga Mizoram bika bill nei tam berin ṭum 23 a nei.
# State páwna bill nei tam berin ṭum 13 a nei.
# Damlo enkawlna ni lo, bill dang MSHCS-in an dawng tel ṭhin.
# Room entitlement ni loa thleng, bill tel tum an awm ṭhin.
# Phai pan ngaite zingah transportation man bill tum an awm ṭhin; a huam lo.
# Bill dik si, cash memo dik si lo an awm. Chungte chu ultrasound/x-ray ti si, report awm leh si lote a ni.
# MRP aia sanga bill lâk tum an awm ṭhin.
# Mizoram chhunga inenkawl sum hmang tam berin Rs. 11,42,742 a bill.
# State páwna bill tam berin Rs. 62,38,234 a bill.
# Sorkar hnathawkte bill 5,293 a nih laiin, an chhungte bill 8,372 a awm.
# State páwnah sorkar hnathawk bill 764 a awm laiin, an chhungte 952 a awm.
# Kum khat chhunga Mizoram bika bill nei tam berin ṭum 23 a nei.
# State páwna bill nei tam berin ṭum 13 a nei.
# Damlo enkawlna ni lo, bill dang MSHCS-in an dawng tel ṭhin.
# Room entitlement ni loa thleng, bill tel tum an awm ṭhin.
# Phai pan ngaite zingah transportation man bill tum an awm ṭhin; a huam lo.
# Bill dik si, cash memo dik si lo an awm. Chungte chu ultrasound/x-ray ti si, report awm leh si lote a ni.
# MRP aia sanga bill lâk tum an awm ṭhin.
# Mizoram chhunga inenkawl sum hmang tam berin Rs. 11,42,742 a bill.
# State páwna bill tam berin Rs. 62,38,234 a bill.
Bill hnâwl zinga 20 vel chu bill lem nia a lan thu thawktute chuan an sawi. Bill lemte chu damloin a awmna damdawi-ina an enkawlna anga a ziah lan, MSHCS-in damdawi-in lam an zawhfiaha case sheet hmuh tur awm si lote a ni. MSHCS-in an endik hnuah bill lut zawng zawng aṭangin Rs. 55,27,22,166 pawmin, an pe chhuak a; Rs. 75,50,390 hû bill hnâwl a ni a, bill tihtlemsak tlingkhawm chu Rs. 12,59,31,913 a tling.