Fall armyworm vanga harsatna tawrhpui

Mizoram Agriculture Service Association (MASA) chuan thuchhuah siamin, vaimim ei chhetu pangang chi khat, fall armyworm Mizoramah a puan avanga lo neitu mi tam takin harsatna an tâwk chu an tawrhpui thu an tarlang.

MASA chuan, fall armyworm vanga harsatna Mizoramin a tawh tirh aṭangin Agriculture department-in sorkar laipuia thlai venhimna lama thuneitu sang - Plant Protection Adviser te, ICAR - Indian Institute of Maize Research te, ICAR - National Institute for Agricultural Insect Resources-te leh ICAR - National Centre for Integrated Pest Management-te beráwn chungin theihtawp chhuahin hma an la tih an sawi a; uluk taka ruahmanna neia hmalak a nih avangin lo neitute chu Agriculture mithiamte thurâwn ang zela hma la turin an ngen.

Fall armyworm puang chu sumdawnna kaihhnawiha hlâwkpuina tèl tuma Agriculture department hmanruate sawi nêp a, mahni company siam chhuah a ṭha ber anga sawi mawi leh politics-a inbeihna hmanruaa hman theih tak a nih avangin mi tin fimkhur turin MASA chuan an ngen a, "Sorkar hmalakna ngaichâng a, theihtawp chhuaha he rannung chimawm tak beihna kawngah Agriculture department-a thawktute ṭawiawm zel turin loneitu te, NGO te, media-te leh political party zawng zawng te, mipuite kan ngen a ni," an ti.

Hetih lai hian, All Mizoram Farmers Union (AMFU) pawhin thuchhuah siamin, Mizoram hmun hrang hranga vaimim ei chhetu fall armyworm a puang vak leh lo neitute'n nasa taka an tuar chu pawi an tih thu an tarlang bawk.