Hnam dang dan loa sumdawng man

Serchhip police-te leh YMA Sub-Hqrs., Serchhip Kumpuan Committee hmalaknain Inrinni khan Serchhipah dan loa hnam dang sumdawng leh Mizo hming hawha hnam dang sumdawngte dap chhuah beihpui an thlak a, dan loa sumdawng mi pali an man.

Serchhip Sub-Hqrs. YMA chuan thuchhuah siamin, tun hnaiah Serchhipah dan loa hnam dang sumdawng an awm nia hriat a nih avang leh ILP hman dik loh a awm nia an hriat avangin Serchhip khawpuia hnam dang sumdawngte an enfiah thu an tarlang a, "Dan bawhchhiaa sumdawng hnam dang pali hmuh chhuah an ni a, hengte hi Mizo-in dan kalha an sponsor leh ILP Condition & Restriction kalha sumdawngte an ni," an ti.

Serchhip Sub-Hqrs. YMA tarlan danin, hnam dangte'n dan loa sumdawnna atana an hman lirthei pathumte pawh police-te'n an man a, Serchhip Police Station-ah hrên a ni. Dan loa sumdawng an mante chu Serchhip Leisang Veng leh Bilzel Veng vela inkulh leh chuta ṭanga dawr bungrua chi hrang hrang motor hmanga zuar chhuak ṭhin an ni.

Mizoin an tih ve theih sumdawnnate chu ram leilung fate'n an thawh ve ngei theih nan leh sumdawnnaa Mizote chîmrala an awm loh nan theihtawp chhuaha hmalak zel an tum thu sawiin Serchhip YMA hruaitute chuan, "Hemi kawngah hian Mizo mipuite 
ṭangrual tur leh dan loa sumdawnna kawnga hnam dang thurualpui lo turin kan ngen a ni," an ti.