Agriculture emergency puan phût

Mizoram Pradesh Youth Congress Committee (MPYCC) chuan thuchhuah siamin, Mizoram puma lo neitute vaimim ei chhetu leh thlai dang tan pawha hlauhawm fall armyworm puang mek do tur leh chak taka hmalak a nih theih nan Mizoram sorkar chu Agriculture Emergency puang turin an phût.

MPYCC chuan, Mizoram hmun hrang hranga lo neitute an mangan hle laiin, Mizoram sorkar chêt danin duhthu a sâm lo hle tih an tarlang a, "Agriculture Minister chu rálkhèl dár rîk fê hnu leh MPYCC-te leh chanchinthar thehdarhtu ṭhenkhatte phût chhuahin rûn dâlah a che chhuak ve chauh. Hetianga hma la chak lo leh ṭuan fûm Agriculture Minister kan nei hi a vanduaithlak hle a ni," an ti.

GAD Aviation Wing-a principal consultant J Lalhmingliana'n dik lo taka Civil Aviation Wing sum tam tak, ama mimal account-a a dah nia hriatah rang taka action la tura complaint Chief Minister hnena an thehluhah action lak a la ni lo tih sawiin MPYCC chuan, "Ngawihbopuia tih zûzî mai a tum nge, a lo inhnamhnawih ru ve reng? Heng avang hian mualpho a hlauh avangin hma a la ngam lo ta mai em ni?" an ti a; thil dik lo ni ngeia hriat MNF sorkarin a haider lui zel dawn a nih chuan, ram leh hnam chhan nan a ṭul ang zela an chêt tur thu an sawi.